शुक्रवार, दि. १२ एप्रिल
लोकसभा निवडणुकीच्या पार्श्वभूमीवर पोलीस रेकॉर्डवर असलेल्या संगमनेरमधील दोघा गुन्हेगारांना नगर जिल्ह्यासह लगतच्या नाशिक जिल्ह्यातील सिन्नर व पुणे जिल्ह्यातील जुन्नर तालुक्यातून हद्दपार करण्याचे आदेश प्रांताधिकारी शैलेंद्र हिंगे यांनी काढले आहेत.
कासिम असद कुरेशी (रा. भारतनगर, संगमनेर) व इस्माईल निसार पठाण (रा. नाईकवाडपुरा, संगमनेर) अशी हद्दपार करण्यात आलेल्या दोघांची नावे असल्याची माहिती संगमनेरचे पोलीस उपअधीक्षक सोमनाथ वाघचौरे यांनी महाराष्ट्र संवाद न्यूजला दिली.
कासिम कुरेशी याच्याविरुद्ध संगमनेर शहर पोलीस ठाण्यात घातक शस्त्राने जीवे मारण्याचा प्रयत्न करणे, जबर दुखापत करणे, बेकायदेशीर जमाव जमवणे, जीवे मारण्याची धमकी देणे, अल्पवयीन मुलीस पालकांच्या कायदेशीर रखवालीतून पळून नेणे, प्राण्यांना निर्दयतेने वागविणे, त्यांची कत्तल करणे अशा स्वरूपाचे शरीराविरुद्धचे चार गुन्हे दाखल आहेत.
इस्माईल पठाण याचा विरुद्ध शहर पोलीस ठाण्यात घातक शस्त्राने जीवे मारण्याचा प्रयत्न करणे, जबर दुखापत करणे, बेकायदेशीर जमाव जमवणे, जीवे मारण्याची धमकी देणे, वाहन चोरी करणे अशा स्वरूपाचे संगमनेर शहर पोलीस ठाण्यात चार गुन्हे दाखल आहेत.
त्यामुळे शहर पोलिसांनी या दोन्ही गुन्हेगारांना कायदा सुव्यवस्था राखण्याच्या दृष्टीने हद्दपार करण्यासाठीचे प्रस्ताव पोलीस उपअधीक्षक वाघचौरे यांच्याकडे पाठवले होते. त्यानंतर पुढील निर्णयासाठी हे प्रस्ताव प्रांताधिकारी हिंगे यांच्याकडे पाठविण्यात आले. हिंगे यांनी या प्रस्तावावर निर्णय देताना कासिम कुरेशी याला एक वर्षांसाठी तर इस्माईल पठाण याला सहा महिन्यांसाठी अहमदनगर जिल्ह्यासह लगतच्या सिन्नर व जुन्नर तालुक्यातून हद्दपार करण्याचे आदेश पारित केले.
सध्या सुरू असलेल्या लोकसभा निवडणुकीच्या पार्श्वभूमीवर पोलीस दलाकडून कारवाई सत्र सुरू असून आणखी कारवाया केल्या जाणार असल्याची माहिती देण्यात आली आहे.
