मंगळवार, दि. १६ एप्रिल
संगमनेरच्या पोलीस निरीक्षकांवर एका महिलेने गंभीर स्वरूपाचे आरोप केले असतानाच आता पोलीस उपनिरीक्षकाचे नवे प्रकरण समोर आले आहे. ३३ वर्षीय पिडीतेने दिलेल्या फिर्यादीवरून या पोलीस उपनिरीक्षकांविरुद्ध पोलीस ठाण्यात गुन्हा दाखल करण्यात आला आहे.
पुण्यातून समोर आलेल्या या प्रकरणात पोलीस उपनिरीक्षकाने पोलीस भरतीची तयारी करणाऱ्या एका युवतीला आपल्या प्रेमाच्या जाळ्यात ओढत जबरदस्तीने तिच्यासोबत शारीरिक संबंध प्रस्थापित केले. त्यातून ती गर्भवती राहिल्याने तिला जामखेड मधील एका हॉस्पिटलमध्ये नेत तिच्या इच्छेविरुद्ध जबरदस्तीने गर्भपात देखील केल्याचे या युवतीने आपल्या तक्रारीत म्हटले आहे. पुण्याच्या शिवाजीनगर पोलीस ठाण्यात याप्रकरणी गुन्हा दाखल करण्यात आला आहे.
किरण माणिक महामुनी (वय ३८, रा. नागपूर) असे गुन्हा दाखल झालेल्या पोलीस उपनिरीक्षकाचे नाव आहे. ऑगस्ट २०१७ ते नोव्हेंबर २०२२ या कालावधीत शिवाजीनगर गावठाण येथे हा प्रकार घडला. महामुनी पोलीस दलात पोलीस उपनिरीक्षक या पदावर कार्यरत असून पीडित युवती पोलीस भरतीची तयारी करत असताना आरोपी उपनिरीक्षकाची तिच्याशी ओळख झाली. ओळखीतून मैत्री आणि मैत्रीतून प्रेम संबंध निर्माण झाल्याने त्याने पीडित युवतीला शिवाजीनगर गावठाणातील एका घरी नेले. तिथे तिच्यासोबत जबरदस्तीने वारंवार शारीरिक संबंध ठेवले. यातून पीडिता गर्भवती राहिली.
पीडित युवती गर्भवती असल्याचे समजतात उपनिरीक्षक महामुनी याने तिला जामखेड तालुक्यातील एका रुग्णालयात नेले. तेथे तिचा गर्भपात करण्यात आला, असे पिडीत महिलेने न्यायालयात तक्रार दाखल केलेली होती. न्यायालयाच्या आदेशाने कलम १५६ (३) प्रमाणे गुन्हा दाखल करण्यात आलेला आहे. पुढील तपास सुरू आहे.
