शनिवार, दि.२७ एप्रिल
सध्या देशभरात लोकसभा निवडणुकीचा माहोल आहे. एकीकडे उन्हाचा पारा उच्चांकाकडे सरकत असताना दुसरीकडे लोकसभा निवडणुक प्रचार देखील तापू लागला आहे. अशा स्थितीत संगमनेर करांना दिलासा देणारी बातमी समोर आली असून संगमनेरची अमृतवाहिनी असलेली प्रवरा नदी महिनाभर वाहती राहणार आहे. त्यामुळे उन्हाच्या आणि निवडणुकीच्या गर्मीमध्ये पाण्याचा थंडावा मिळणार आहे.
उन्हाळी हंगामातील पिण्यासाठी व शेतीच्या सिंचनासाठी निळवंडे धरणातून शनिवारी सायंकाळी प्रवरा नदीपात्रात १३५० क्युसेसने पाणी सोडण्यात आले आहे. या आवर्तनामुळे शेती पिकांना देखील मोठा दिलासा मिळणार आहे. महिनाभरासाठी हे आवर्तन असल्याने प्रवरा नदी वाहती राहणार आहे.
ऐन उन्हाची लाही-लाही त्यातच लोकसभा निवडणुकीचा चढलेला ज्वर यामुळे शिर्डी लोकसभा मतदारसंघातील वातावरण चांगलेच तापले आहे. उन्हातानात उमेदवार, पक्षाचे नेतेमंडळी आणि त्यांचे समर्थक मतदारांच्या गावोगावी मतांचा जोगवा मागताना दिसत आहे. सोमवारी उमेदवारी माघारी नंतर प्रचाराचा आखाडा चांगलाच रंगणार असून या मतदारसंघात निवडणूक सभांचा धडाका उडणार आहे. या पार्श्वभूमीवर अमृतवाहिनी प्रवरा माई मात्र संगमनेर करांना थंडावा देणार आहे.
