शनिवार, दि. १८ मे
पतसंस्थेला कर्जाच्या थकबाकी पोटी दिलेला धनादेश न वटल्याने संस्थेची फसवणूक केल्याप्रकरणी फौजदारी न्यायालयाने शनिवारी संगमनेरातील सुवर्ण व्यावसायिकाला तब्बल चार लाख रुपयांचा दंड आणि एक वर्ष सक्तमजुरीची शिक्षा ठोठावली आहे. रुपेश सुभाष वर्मा असे शिक्षा झालेल्या आरोपीचे नाव आहे. न्यायालयाच्या या निर्णयामुळे आर्थिक संस्थांना न वटणारे धनादेश देणाऱ्यांमध्ये चपराक बसली असल्याचे मानले जाते.
संगमनेरच्या बाजारपेठेतील सुवर्ण व्यावसायिक रुपेश सुभाष वर्मा यांनी शहरातील राष्ट्रसंत आचार्य आनंदऋषीजी महाराज नागरी सहकारी पतसंस्थेकडून तीस लाख रुपयांचे जमीन व गृहतारण कर्ज २०१८ मध्ये घेतले होते. आज अखेर या कर्जाची थकबाकी ६७ लाखावर गेली आहे. संस्थेने वारंवार त्यांच्याकडे कर्ज रकमेची मागणी केल्यानंतर वर्मा यांनी संस्थेला धनादेश वटण्याची हमी देत २ लाख ४८ हजार ०८० रुपयांचा धनादेश पतसंस्थेला कर्जाच्या थकबाकीपोटी दिला होता.
सदरचा धनादेश न वटता परत आल्याने संस्थेने याची कल्पना वर्मा यांना देत पैसे भरण्यास सांगितले. मात्र सुवर्ण व्यावसायिक वर्मा यांनी पैसे न भरल्याने संस्थेने संगमनेरच्या न्यायालयात न वटणारा धनादेश देत पतसंस्थेची फसवणूक केल्याप्रकरणी २०१९ मध्ये निगोशिएबल इन्स्ट्रुमेंट्स ॲक्ट कलम १३८ नुसार फिर्याद दाखल केली होती. सुवर्ण व्यावसायिका विरोधात धनादेश बाउन्स प्रकरणी दाखल झालेल्या या खटल्याकडे संगमनेरकरांचे लक्ष लागले होते.
दिवाणी व फौजदारी न्यायाधीश श्रीमती एम. जे. गायकवाड यांच्यासमोर या खटल्याची सुनावणी सुरू होती. फिर्यादी संस्थेचे वकील ॲड. राजेश भुतडा यांनी न्यायालयासमोर संस्थेची बाजू मांडत त्यासाठी आवश्यक त्या गोष्टी न्यायालयासमोर आणल्या. तसेच संस्थेचे व्यवस्थापक गजानन ठाकरे यांची देखील या खटल्यात साक्ष नोंदविण्यात आली.
फिर्यादी संस्था आणि आरोपीच्या वकिलांचा युक्तिवाद ऐकल्यानंतर न्यायाधीश एम. जे. गायकवाड यांनी आरोपी रुपेश सुभाष वर्मा याला दोषी ठरविले. खटल्यात व्यवस्थापक ठाकरे यांचा जबाब महत्त्वपूर्ण ठरला त्यांना संस्थेचे वसुली अधिकारी रामदास घुले यांनी, तर संस्थेचे कायदेविषयक सल्लागार ॲड. राजेश भुतडा यांना ॲड. स्वप्निल उपरे यांनी सहाय्य केले.
