सोमवार, दि. २० मे
पुण्याच्या वानवडीतील महंमदवाडी येथे ज्वेलर्सच्या दुकानात शिरूर दिवसाढवळ्या दरोडा टाकणाऱ्या सात दरोडेखोरांच्या टोळीला पुणे पोलिसांच्या पोलीस शाखेने वेगवेगळ्या ठिकाणाहून अटक केली. काही तासांच्या आतच या टोळीकडून पोलिसांनी ६०१ ग्रॅम वजनाचे सोने, २ दुचाकी, १ चारचाकी, ६ मोबाईल असा सुमारे ५० लाखाचा मुद्देमाल हस्तगत केला आहे.
दरोडेखोरांच्या टोळीने शनिवारी महंमदवाडी रस्त्यावरील बीजीएस ज्वेलर्स येथे खरेदीच्या बहाण्याने चेहऱ्याला मास्क लावून सराफी पेढीत जात मालक आणि कर्मचाऱ्यांना बंदुकीचा धाक दाखवत दुकानातील दागिने घेऊन पोबारा केला होता.
या घटनेची माहिती मिळताच गुन्हे शाखेचे अपर पोलीस आयुक्त शैलेश बलकवडे, उपायुक्त अमोल झेंडे यांनी घटनास्थळी भेट दिली होती. त्यांच्या मार्गदर्शनाखाली तात्काळ गुन्हे शाखा, खंडणी विरोधी पथक, दरोडा व वाहन चोरी विरोधी पथक, युनिट चार, पाच, सहा अशी वेगवेगळे दहा पथके आरोपीच्या मार्गावर पाठविली होती.
पथकातील पोलिसांनी तातडीने तपासाची चक्र फिरवत या टोळीचा छडा लावण्यात यश मिळवले. याशिवाय आरोपींकडून चोरीचा मुद्देमाल देखील हस्तगत करण्यात आला. या टोळीतील आरोपींना गुन्हे शाखेच्या पोलिसांनी अहमदनगरच्या भिंगार, रायगड आणि चाकण येथे पकडत त्यांना अटक करण्यात यश मिळविले.
बंदुकीचा धाक दाखवत यांनी लुटले होते दागिने…
सनी उर्फ योगेश हिरामण पवळे (वय २०, रा. कोथरूड), सनी उर्फ आदित्य राजू गाडे (वय १९, रा. कोथरूड), पियुष कल्पेश केदारी (वय १८ रा. येरवडा), ओंकार उर्फ ओम्या जगन वाल्हेकर (वय १९, रा. कोथरूड), नारायण उर्फ नारू बाळू गवळी (वय २०, रा. कात्रज), मयूर चुनीलाल पटेल (रा. वानवडी) आणि नासिर मेहमूद शेख (वय ३२ रा. वानवडी)
