बुधवार, दि. २२ मे
वाळू तस्करांकडून श्रीरामपूरमध्ये पोलिसाच्या अंगावर ट्रॅक्टर घालून जीवे मारण्याचा प्रयत्न केल्याची घटना ताजी असतानाच आता सहाय्यक पोलीस अधीक्षकांच्या पथकाला धक्काबुक्की करून दमदाटीने वाळूची चोरटी वाहतूक करणारा ट्रॅक्टर पळवून नेल्याची घटना समोर आली आहे. या प्रकरणातील धक्कादायक बाब म्हणजे एका पोलीस पाटलानेच हे ट्रॅक्टर पळवून लावण्यात वाळू माफियांना मदत केली असल्याचे समोर आले आहे.
श्रीरामपूर येथील सहाय्यक पोलीस अधिक्षक जीवन बेनीवाल यांना महांकाळ वडगाव शिवारात गोदावरी नदीपात्रात एक ट्रॅक्टर अवैधरित्या वाळूची चोरटी वाहतूक करत असल्याची माहिती मिळाली. या माहितीच्या अनुषंगाने सहाय्यक पोलीस अधिक्षक बेनीवाल यांनी सोमवारी पोलीस कॉन्स्टेबल रोहिदास आंधळे, पोलीस नाईक अनिल शेंगाळे, पोलीस कॉन्स्टेबल संभाजी केशव वारे, चाँद पठाण यांच्या पथकाला कारवाई करण्याचे आदेश दिले.
पथकाने घटनास्थळी जात खात्री केली असता त्यांना तेथे निळ्या रंगाचा ट्रॅक्टर बेकायदेशीररित्या वाळूचा उपसा करताना दिसून आला. पथकाने ट्रॅक्टर ताब्यात घेतला. मात्र, चालकाने पोलिसांना धक्काबुक्की करून ट्रॅक्टर वैजापूर तालुक्यातील नागमठाणच्या दिशेने पळविला. पथकाने ट्रॅक्टरचा पाठलाग केला, तेव्हा चालक नागमठाण शिवारातील एका शेतात ट्रॅक्टर सोडून पसार झाला.
त्या ठिकाणी पथकडून पुन्हा जप्तीची कारवाई सुरू असताना अण्णासाहेब गायकवाड, शंकर गायकवाड, महेश गुंजाळ, पोलिस पाटील गणेश नरहरे व अन्य चार ते पाच इसम त्या ठिकाणी आले. त्यांनी पोलिसांच्या पथकाने ताब्यात घेतलेला ट्रॅक्टर बळजबरीने धक्काबुक्की करून तसेच ट्रॅक्टरमधील वाळू नागमठाण येथील शेतामध्ये खाली करून ट्रॅक्टर पळवून लावला.
या संदर्भात पोलिसांनी सोमवारी रात्री अण्णासाहेब गायकवाड, शंकर गायकवाड, महेश गुंजाळ व पोलीस पाटील गणेश नरहरे यांच्यासह अन्य चार ते पाच जणांविरोधात शासकीय वाळू चोरी करून पोलिसांना धक्काबुक्की करून ट्रॅक्टर पळून नेल्याप्रकरणी पोलिसात गुन्हा दाखल केला असून पोलीस पुढील तपास करत आहे.
