गुरुवार, दि. ३० मे
मनुस्मृति दहन करण्याच्या नादात राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड यांच्याकडून महामानव डॉ. बाबासाहेब आंबेडकर यांचे छायाचित्र फाडले गेले. याप्रकरणी आव्हाड यांनी माफी मागितल्यानंतर देखील राज्यात त्यांच्या विरोधात आंदोलने सुरू आहे. या पार्श्वभूमीवर व्यक्तिगत भावना दुखविल्याच्या कारणावरून संगमनेर शहर पोलीस ठाण्यात आमदार आव्हाड यांच्याविरुद्ध दिलेल्या तक्रारीवरून अदखलपात्र गुन्ह्याची नोंद करण्यात आली आहे.
शहर पोलीस ठाण्यात येथील विकास साहेबराव जाधव (वय ३० वर्ष, रा. सय्यद बाबा चौक, संगमनेर) यांनी दिलेल्या फिर्यादीवरून आव्हाड यांच्या विरोधात भारतीय दंड विधान कलम ५०४ प्रमाणे बुधवारी गुन्हा नोंद करण्यात आला आहे.
दरम्यान याच विषयावरून महायुतीच्या पदाधिकारी कार्यकर्त्यांनी संगमनेरमध्ये आव्हाड यांच्या प्रतिमेला जोडेमार आंदोलन केले होते. आव्हाड यांनी महाडमध्ये केलेल्या आंदोलनाचे पडसाद आता राज्यभर उमटू लागले आहे.
