रविवार, दिनांक ९ जून २०२४
बहुचर्चित नगर अर्बन बँक घोटाळ्याप्रकरणी बडा थकबाकीदार कर्जदार संगमनेरमधील उद्योजक अमित पंडित यांनी जामिनावर मुक्तता होताच १५ दिवसांच्या आत न्यायालयाच्या आदेशाचे पालन करत दोन कोटी रुपयांचा डिमांड ड्राफ्ट न्यायालयात जमा केल्याची माहिती समोर आली आहे.
तब्बल २९१ कोटी रुपयांच्या घोटाळ्यात संगमनेरमधील कर्जदार आरोपी म्हणून उद्योजक अमित पंडित यांचे नाव समोर आले होते. त्यानंतर नगरच्या आर्थिक गुन्हे शाखेने त्यांना अटक देखील केली. तब्बल दोन महिन्यानंतर पंडित यांना न्यायालयाने काही अटींवर एक लाख रुपयांचे वैयक्तिक जात नसेल त्यावर तीन महिन्यांसाठी अंतरिम जामीन मंजूर केला होता.
जामिनावर मुक्तता होताच पंडित यांनी पंधरा दिवसाच्या आत दोन कोटी रुपये व त्यानंतरच्या तीन महिन्याच्या कालावधीत ८ कोटी ६४ लाख ३३ हजार ०४७ रुपये भरण्याची प्रमुख अट उच्च न्यायालयाने घातली होती. त्यानुसार पंधरा दिवसांची मुदत संपण्यापूर्वी पंडित यांनी न्यायालयात कबूल केल्याप्रमाणे दोन कोटी रुपयांचा डिमांड ड्राफ्ट न्यायालयात जमा केला आहे. असे असले तरी पंडित यांस अद्यापही येत्या तीन महिन्याच्या कालावधीत ८ कोटी ६४ लाख ३३ हजार ०४७ रुपये भरावे लागणार आहे.
कर्जदार आरोपी पंडित याने स्वतःचा पत्नी व मुलाच्या तसेच भागीदाराच्या नावावर मोठ्या रकमेचे कर्ज घेतले आहे. इतर ठिकाणचे कर्ज फेडण्यासाठी व नवीन मशिनरीच्या खरेदीसाठी त्याने हा प्रकार केलेला होता. आरोपी कर्ज फेडण्यास पात्र आहे की नाही याची देखील तत्कालीन कर्ज मंजूर करणाऱ्या व्यक्तींनी शहानिशा केली नाही आणि अशाच पद्धतीचे अनेक घोटाळे नगर अर्बन बँक गैरव्यवहार प्रकरणात घडलेले आहेत .
नगर अर्बन बँक आर्थिक घोटाळ्याचा तपास नगरच्या आर्थिक गुन्हे शाखेचे पोलीस उपाधीक्षक अमोल भारती करत आहेत. बँकेच्या संचालक मंडळाने मोठ्या प्रमाणात बेकायदेशीररित्या कर्जवाटप केल्याने ठेवीदारांच्या ठेवी अडकून पडल्या आहेत. बँकेवर नेमलेल्या अवसायकांकडून या कर्ज वसुलीसाठी पावले उचलले गेल्यास ठेविदारांना दिलासा मिळू शकतो. मात्र मोठ्या प्रमाणात कर्ज उचलायचे आणि किरकोळ रकमेवर सेटलमेंट करायची यामुळे ठेवीदारांच्या नुकसानीत वाढ होण्याची चिन्हे आहेत.
