रविवार दिनांक १६ जून २०२४
शेअर ट्रेडिंगमध्ये नफा मिळवून देण्याचे आमिष दाखवत एका सेवानिवृत्त कर्मचाऱ्याची रिचा सेठी नावाच्या महिलेने ६६ लाख ५० हजार रुपयांची फसवणूक केल्याचा प्रकार अहमदनगरमध्ये समोर आला आहे. या संदर्भात शुक्रवारी अहमदनगरच्या सायबर पोलीस ठाण्यात गुन्हा दाखल करण्यात आला आहे.
अधिक माहिती अशी, फिर्यादीच्या व्हॉट्सअपवर रिचा सेठी नावाच्या महिलेचा शेअर ट्रेडिंगबाबत मेसेज आला होता. या मेसेजच्या अनुषंगाने फिर्यादीने संबंधित महिलेकडून शेअर ट्रेडिंग बाबत अधिक माहिती घेतली. त्याच दरम्यान महिलेने फिर्यादीचा विश्वास संपादन करत शेअर ट्रेडिंग मध्ये पैसे गुंतवल्यास अधिक नफा मिळवून देण्याचे आमिष दाखविले.
जास्तीचे पैसे मिळण्याच्या आमिषाने या सेवानिवृत्त कर्मचाऱ्यांनी सेठी नावाच्या महिलेने सांगितलेल्या बँक खात्यात २० मार्च ते १२ मे २०२४ या कालावधीत वेळोवेळी तब्बल ६६ लाख ५५ हजार रुपये पाठविले. त्यानंतर फिर्यादीने संबंधित महिलेकडे पैसे मागण्यास सुरुवात केल्यावर समोरून त्यांना उडवाउडवीची व वेळकाढूपणाची उत्तरे देण्यात आली. त्यानंतर फोनही बंद करण्यात आला.
त्यामुळे गुंतवणूक केलेली रक्कम आणि त्यावरील अधिकचा परतावा न मिळाल्याने आपले फसवणूक झाल्याचे लक्षात आल्यानंतर संबंधित कर्मचाऱ्याने नगरच्या सायबर पोलीस ठाण्यात धाव घेत तक्रार दाखल केली.
सायबर पोलिसांनी रिचा सेठी नावाच्या अनोळखी महिलेवर भादंवि कलम ४१९, ४२० सह माहिती तंत्रज्ञान अधिनियम कलम ६६ (ड) नुसार गुन्हा दाखल केला असून अधिक तपास प्रभारी अधिकारी पोलीस निरीक्षक दिनेश आहेर करत आहेत.
