धक्कादायक… संगमनेरच्या पोलीस उपनिरीक्षकाची आत्महत्या, झाडाला गळफास घेतलेल्या अवस्थेत आढळला मृतदेह

शुक्रवार, दि. ०७ फेब्रुवारी –

संगमनेर तालुक्यातील रहिवासी असलेल्या आणि पुणे पोलीस दलात कार्यरत असलेल्या पोलीस उपनिरीक्षकाने लोणावळ्यात टायगर पॉईंट येथे झाडाला गळफास घेऊन आत्महत्या केल्याचा प्रकार समोर आला आहे. यामुळे पुणे पोलीस दलात मोठी खळबळ उडाली आहे.

अण्णा उर्फ अनिल बादशहा गुंजाळ असे आत्महत्या करणाऱ्या पोलीस उपनिरीक्षकाचे नाव असून त्यांनी हे टोकाचे पाऊल का उचलले याचे कारण अद्याप अस्पष्ट आहे. समोर आलेल्या माहितीनुसार, उपनिरीक्षक असलेले अण्णा गुंजाळ हे गेल्या दोन वर्षापासून पुण्यातील खडकी पोलीस ठाण्याच्या तपास पथकामध्ये कार्यरत होते.

गेल्या तीन दिवसांपासून ते कर्तव्यावर नव्हते. वारंवार त्यांना संपर्क करून देखील कुटुंबीयांचा त्यांच्याशी संपर्क होत नसल्याची प्राथमिक माहिती समोर येत आहे. त्यामुळे कुटुंबियांकडूनही त्यांचा शोध सुरू होता. अखेर आज त्यांचा तपास लागला असता त्यांनी गळफास घेऊन आत्महत्या केल्याचा समोर आलं आहे.

गुंजाळ यांनी आत्महत्या केलेल्या लोणावळ्यातील टायगर पॉईंट वर त्यांची क्रेटा गाडी सुद्धा आढळून आली आहे. या गाडीत एक डायरी सापडली असून या डायरीमध्ये गुंजाळ यांच्या आत्महत्येच कारण असल्याची शक्यता वर्तवली जात आहे. या डायरीमध्ये गुंजाळ यांनी आत्महत्या पूर्वी काही सुसाईड नोट लिहून ठेवली आहे का याचा देखील पोलिसांकडून तपास केला जात आहे.

दरम्यान घटनेची माहिती मिळताच लोणावळा ग्रामीण पोलीस घटनास्थळी दाखल झाले असून खडकी पोलिसांचे एक पथकही लोणावळा येथे रवाना झाले होते. पोलिसांनी गुंजाळ यांच्या मृतदेहासह टायगर पॉईंटवर आढळून आलेली त्यांची क्रेटा गाडी ताब्यात घेतली आहे. घटनास्थळी पोहोचलेल्या पोलिसांनी शिवदुर्ग मित्र रेस्क्यू पथकाच्या सदस्यांच्या मदतीने गुंजाळ यांचा मृतदेह खाली उतरविला.

लोणावळा पोलिसांकडून पोलीस उपनिरीक्षक अण्णा गुंजाळ यांच्या आत्महत्येमागचं नेमकं कारण शोधले जात आहे.

संगमनेरमधील खांडगावचे रहिवासी…

दरम्यान पुणे पोलीस दलात पोलीस उपनिरीक्षक असलेले अण्णा गुंजाळ हे संगमनेर तालुक्यातील खांडगाव येथील रहिवासी असून सर्वसामान्य कुटुंबातील आहेत. त्यांच्या मृत्यूची बातमी संगमनेरमध्ये येताच परिसरात दुःखद वातावरण निर्माण झाले आहे. दुर्दैवी वृत्त समजतात त्यांच्या कुटुंबीयांनी घटनास्थळी धाव घेतली आहे.