जोशी स्वीट होम अन्न व औषध प्रशासनाच्या रडारवर, कारवाईकडे लक्ष
प्राप्त झालेल्या अहवालावर सहाय्यक आयुक्त, अन्न व औषध प्रशासन विभागाकडून कारवाई केली जाणार असल्याची माहिती मिळाली आहे.
संगमनेर, दि. १५ फेब्रुवारी – प्रतिनिधी
जोशी स्वीट होम मधील अन्नपदार्थांच्या संदर्भाने तक्रारी झाल्यानंतर संगमनेर शहरातील छत्रपती शिवाजी महाराज पुतळ्याजवळील त्यांच्या मुख्य दुकानात काही दिवसांपूर्वी अहिल्यानगरच्या अन्न औषध प्रशासन विभागाच्या अधिकाऱ्यांकडून तपासणी करण्यात आली व या तपासणीचा अहवाल आता समोर आला आहे. या अहवालानुसार ही चौकशी सुरू असल्याची माहिती संबंधित विभागाकडून देण्यात आली आहे.
संगमनेरमधील जोशी स्वीट होम हे विशेषतः जिलेबी, गुलाबजाम आणि मिठ्ठावडा यासाठी सर्वत्र प्रसिद्ध आहे. येथील सर्वच गोड आणि खारा माल संगमनेर शहर आणि तालुक्यातच नव्हे तर जिल्ह्यात प्रसिद्ध आहे. राज्यातील संगमनेरमधील रहिवासी देखील जोशी स्वीट होमचे चहाते आहेत. मात्र या दुकानाविषयी अन्न व औषध प्रशासनाने कार्यवाही सुरू केल्यानंतर हे दुकान चर्चेत आले आणि या दुकानातील मिठाईजन्य पदार्थांबाबत संशयाचे वातावरण निर्माण झाले.
अन्न व औषध प्रशासन कार्यालयाच्या अधिकाऱ्यांनी जोशी स्वीट होम मधील मिठाईची तसेच अन्न पदार्थाची तपासणी केली असून या संदर्भातील एक सविस्तर अहवाल समोर आला आहे. या अहवालात अनेक मुद्दे उपस्थित झाले असून वादग्रस्त मुद्द्यांवर तपासणी सुरू आहे. तसेच येथील मालामध्ये काही भेसळ होते काय याचे देखील नमुने पाठवून त्याचा देखील अहवाल देखील अहवाल प्राप्त झाल्यानंतर पुढील कार्यवाही होणार असून काही नमुने पुन्हा तपासण्यासाठी घेतले जाण्याची शक्यता निर्माण झाली आहे.
अहिल्या नगरच्या अन्न व औषध प्रशासन विभागाच्या अधिकाऱ्यांकडून संबंधित दुकानदाराला नोटीस काढून त्रुटींची पूर्तता करण्यास सुचविण्यात आले आहे. प्राप्त झालेल्या अहवालावर सहाय्यक आयुक्त, अन्न व औषध प्रशासन विभागाकडून कारवाई केली जाणार असल्याची माहिती मिळाली आहे.
