अहिल्यानगर, दि. २१ फेब्रुवारी –
अपहाराच्या गुन्ह्यात अटक झालेले तसेच कामकाजात हलगर्जीपणा केल्याच्या कारणावरून सक्तीच्या रजेवर पाठविलेल्या अहिल्यानगर महापालिकेचे आरोग्य विभागप्रमुख तथा वैद्यकीय अधिकारी डॉ. अनिल बोरगे यांना अखेर सेवेतून निलंबित करण्यात आले आहे.
वैद्यकीय अधिकारी डॉ. अनिल बोरगे अहिल्यानगर महानगरपालिकेच्या आरोग्य विभागात कार्यरत होते. महानगरपालिकेचे आयुक्त तथा प्रशासक यशवंत डांगे यांनी डॉ. बोरगे यांच्या निलंबनाचे आदेश आज (२१ फेब्रुवारी) काढले आहे.
राष्ट्रीय आरोग्य अभियानामध्ये राज्यातील सर्व महानगरपालिकांमध्ये अत्यंत पातळीवर अहिल्यानगर महानगरपालिकेच्या आरोग्य विभागाचे कामकाज झाल्याचा ठपका आरोग्य सेवा संचालकांनी ठेवला होता. या संबंधितांनी महापालिकेला देखील कळविले होते. त्यानंतर आयुक्त डांगे यांनी डॉ. बोरगे यांना नोटीस बजावत कामकाजात सुधारणा करण्याचे आदेश दिले होते. परंतु कामकाजात सुधारणा न झाल्याने त्यांना सक्तीच्या रजेवर पाठवण्यात आले होते.
मनपा आयुक्त डांगे यांनी या पार्श्वभूमीवर जानेवारीमध्ये आरोग्य विभागातील कामकाजाची चौकशी व तपासणी करण्यासाठी एक तीन सदस्यांची समिती नियुक्त केली होती. या डॉ. बोरगे यांच्यासह राष्ट्रीय आरोग्य अभियानचे शहर लेखा व्यवस्थापक विजयकुमार महादेव रणदिवे यांच्याविरुद्ध आर्थिक गैरव्यवहारासह विविध आक्षेप नोंदवत ठपका ठेवला होता.
समितीने सादर केलेल्या अहवालामध्ये विजयकुमार रणदिवे व डॉ. अनिल बोरगे यांच्याविरुद्ध आर्थिक अपहारासह विविध प्रक्षेप नोंदवत ठपका ठेवण्यात आला होता. रणदिवे आणि बोरगे यांनी १६ लाख ५० हजार रुपयांचा अपहार केला. १५ लाखाची रक्कम रणदिवे यांच्या खात्यात जमा केली व पुन्हा प्रत्येकी पाच-पाच लाख रुपये तीनदा पंधराव्या वित्त आयोगाच्या खात्यात ऑनलाईन पद्धतीने जमा केले त्यासाठी सक्षम प्राधिकार्याची मंजुरी घेतली नाही.
देयकातून सरकारी कपाती व ईपीएफ मधून कपात केलेल्या रकमांचा भरणा खात्यावर केला नाही. विविध योजनांचे लेखी व कॅशबुकमध्ये त्रुटी आढळून आल्या. पीसीपीएनडीटी, बॉम्बे नर्सिंग ॲक्टअंतर्गत परवाना देण्यामध्ये त्रुटी आढळल्या. सेवा हमी कायद्यानुसार देण्यात येणाऱ्या सेवेत अनियमितता आढळून आली.
आरोग्य विभागातील अधिकारी, कर्मचाऱ्यांवर संबंधित अधिकाऱ्यांचे नियंत्रण नसणे. कंत्राटी पदे भरतीमध्ये अनियमितता आढळून आली. असे अनेक ठपके समितीने डॉ. बोरगे यांच्यावर ठेवले होते. त्यामुळे बोरगे यांना नोटीस बजावून विचारलं करण्यात आली होती. मात्र त्यांनी कोणताही खुलासा न केल्याने अपहाराच्या आरोपावरून बोरगे व रणदिवे यांच्या विरोधात कोतवाली पोलिस ठाण्यात गुन्हा दाखल करण्यात आला होता. या प्रकरणात दोघांनाही अटक झाली होती.
आयुक्तानी आपल्या निलंबनाच्या आदेशात म्हटले आहे की, बोरगे यांनी लोकसेवा म्हणून स्वतःच्या पदाचा अधिकाराचा गैरवापर करत गुन्हेगारीत स्वरूपाचे वर्तन केले. मनपा कर्मचाऱ्याने अशोभनीय गैरवर्तन केले. यामुळे मनापासून जनमानसातील प्रतिमा मलीन झाली. महाराष्ट्र नागरी सेवा वर्तणूक नियम १९७९ मधील नियम ३ (एक), (दोन), (तीन), (एक) मधील तरतुदीचा भंग केल्याच्या कारणावरून तसेच मनपा अधिनियम कलम ५६ (दोन), (फ) मधील तरतुदीनुसार निलंबन करण्यात येत असल्याचे म्हटले आहे.
