रविवारी संगमनेरमध्ये रोटरी क्लबचा आनंदी रस्ते उपक्रम… सहभागाचे आवाहन

संगमनेर, दि. २२ फेब्रुवारी –
संगमनेर रोटरी क्लबच्या वतीने उद्या रविवारी (२३ फेब्रुवारी) स्वर्गीय ओंकारनाथ मालपाणी मार्गावर आनंदी रस्ते या अनोख्या उपक्रमाचे आयोजन करण्यात आल्याची माहिती देण्यात आली आहे.
सकाळी ७ ते १० या वेळेत विद्यार्थी आणि नागरिकांसाठी आनंददायक ठरणाऱ्या या उपक्रमात संगमनेरमधील विविध शाळांचे विद्यार्थी मोठ्या संख्येने सहभागी होणार असून विविध मनोरंजनात्मक आणि क्रीडा संबंधी कार्यक्रमाचे यात आयोजन करण्यात आले आहे.
उपक्रमामध्ये झुंबा डान्स, रॉक बँड, मल्लखांब, गाणी सादरीकरण, खेळणी वाटप आणि मनोरंजक गोष्टी सादरीकरण यांसारखे उपक्रम घेण्यात येणार आहेत. नागरिकांनी आपल्या कुटुंबासह या उपक्रमात सहभागी व्हावे आणि आनंददायी वातावरणाचा अनुभव घ्यावा, असे आवाहन रोटरी क्लबचे अध्यक्ष साईनाथ साबळे यांनी केले आहे.
“आनंदी रस्ते” उपक्रमामुळे शहरातील नागरिकांना आरोग्यदायी वातावरणात सकाळचा आनंद घेण्याची संधी मिळणार आहे. सर्व संगमनेरकरांनी या उपक्रमात मोठ्या संख्येने सहभागी व्हावे आणि संगमनेरच्या रस्त्यांवर आनंद साजरा करावा, असे आवाहन संयोजकांनी केले आहे.