संगमनेरमध्ये रोटरी क्लबच्या ‘आनंदी रस्ते’ उपक्रमास नागरिकांचा प्रतिसाद

संगमनेर –
रोटरी क्लब ऑफ संगमनेर तर्फे आयोजित करण्यात आलेला ‘आनंदी रस्ते’ हा अनोखा उपक्रम रविवारी उत्साहात पार पडला. शहरातील आबालवृद्धांनी मोठ्या संख्येने सहभाग नोंदवत या उपक्रमाला प्रतिसाद दिला.
रोटरी क्लबच्या आनंदी रस्ते या उपक्रमात नाशिक पदवीधर मतदार संघाचे आमदार सत्यजीत तांबे, माजी नगराध्यक्ष दुर्गाताई तांबे, एकविरा फाउंडेशनच्या अध्यक्ष जयश्री थोरात तसेच संगमनेर शहरातील अनेक मान्यवर सहभागी झाले होते.
यंदा या उपक्रमाचे नववे वर्ष होते आणि यामध्ये विविध मनोरंजनात्मक आणि सांस्कृतिक कार्यक्रमांचे आयोजन करण्यात आले. स्ट्रॉबेरी इंग्लिश मीडियम स्कूलने गायन, पथनाट्य, मल्लखांब तसेच वादनाचे कार्यक्रम सादर केले. या कार्यक्रमाचे विशेष आकर्षण प्रयागराज कुंभमेळ्याच्या थीमवर आधारित आयोजन होते, ज्यामध्ये अघोरी साधू म्हणून उद्योजक प्रकाश कलंत्री, आनंद मणियार व ऋग्वेद वाकचौरे हे प्रमुख आकर्षण ठरले.
तसेच झुंबा डान्स, मल्लखांब, जादूचे प्रयोग, अरविंद गाडेकर यांची व्यंगचित्र सादरीकरण आदींच्या माध्यमातून कार्यक्रमाने उपस्थितांची मने जिंकली.
कार्यक्रमाचे मुख्य आकर्षण म्हणजे अडीच हजार चौरस फूट लांबीचा तिरंगा नागरिकांनी फडकविला. वंदे मातरमच्या जयघोषाने संपूर्ण वातावरण देशभक्तीने भारून गेले.
हा उपक्रम यशस्वी करण्यासाठी रोटरी क्लब संगमनेरचे अध्यक्ष साईनाथ साबळे, सेक्रेटरी विश्वनाथ मालाणी, उपाध्यक्ष महेश वाकचौरे, खजिनदार विकास लावरे तसेच सर्व प्रकल्प प्रमुख, प्रकल्प समन्वयक आणि रोटरी सदस्यांनी विशेष मेहनत घेतली.
या उपक्रमासाठी मे. पोपट भगीरथ महाले ज्वेलर्स, बंसल क्लासेस, मायक्रोन एरोसोल, राजपाल क्लॉथ, रॉयल इव्हेंट्स, सप्तरंग पेंट्स, गॅझेट हब, राजेंद्र होंडा, प्राईम इंटरप्रायजेस, डॉ. सचदेव सोनोग्राफी सेंटर, संत गुलाबबाबा रंग भंडार आणि साईनाथ साबळे अँड कंपनी यांनी आर्थिक मदत करत मोलाचे योगदान दिले.
‘आनंदी रस्ते’ उपक्रमामुळे संगमनेर शहरात सकारात्मक ऊर्जा निर्माण झाली असून, हा उपक्रम पुढील वर्षी अधिक उत्साहात साजरा केला जाईल, असे आयोजकांनी सांगितले.