तरुणीला शरीरसंबंधासाठी पैसे दिले म्हणणाऱ्या आरोपी दत्तात्रय गाडेच्या बँक खात्यात पोलिसांना आढळली इतकी रक्कम…

महाराष्ट्र संवाद न्यूज
पुणे, दि. ३ मार्च –
पुणे स्वारगेट बस स्थानक अत्याचार प्रकरणातील आरोपीने गुन्ह्याची कबुली देण्याऐवजी उलट पीडित तरुणीवर खळबळजनक आरोप केले होते. पीडित तरुणीला शरीर संबंधासाठी साडेसात हजार रुपये दिल्याचा आरोप करणाऱ्या आरोपीच्या बँक खात्याची पोलिसांनी तपासणी केली आहे.
२६ वर्षीय तरुणीवर स्वारगेट बस स्थानकामध्ये बलात्कार झाल्याची घटना समोर आली होती. या घटनेमुळे राज्यभर खळबळ उडाली होती तसेच यंत्रणेविरोधात राज्यभर संताप व्यक्त केला जात होता. या प्रकरणातील मुख्य आरोपी नराधम दत्तात्रय गाडे याला पुणे पोलिसांनी अटक केली होती. त्याला पकडून देण्यासाठी लाखभर रुपयांचे बक्षीस देखील पोलिसांनी जाहीर केले होते.
आरोपी गाडे याच्या वकिलांनी पीडित तरुणीवर तरुणीवर कुठलीही बळजबरी केली नाही. तिनेच मला बोलावले आणि आम्ही बसमध्ये गेलो. तिने माझ्याकडून साडेसात हजार रुपये घेतले. तसेच, त्या ठिकाणी तरुणीचा एक एजंटही उपस्थित होता. पिडीत तरुणीवर बलात्कार झालाच नाही. दोघांमध्ये जे घडले ते संमतीने झाले, असा दावा केला होता.
त्यानंतर पुणे पोलिसांनी आरोपीच्या बँक खात्यासंबंधी तसेच मोबाईल मधून करण्यात आलेल्या फोन कॉल संबंधीची माहिती काढली आहे. या माहितीत आरोपी दत्तात्रय गाडे यांच्या बँक खात्यात पीडित तरुणीवर बलात्कार करण्यापूर्वी केवळ २४९ रुपये शिल्लक असल्याची माहिती समोर आली आहे. त्यामुळे आरोपी आणखी अडचणीत अडकल्याचे समोर येत आहे.
त्यामुळे न्यायालयात वकिलांनी आपल्या युक्तिवादा दरम्यान दावा केल्याप्रमाणे तरुणीला शरीर संबंध ठेवण्यासाठी जे साडेसात हजार रुपये देण्यात आले ते पैसे आरोपीने कोठून आणले असा प्रश्न आता उपस्थित झाला आहे. तसेच गुन्हा घडल्यानंतर आरोपी गाडे आपला मोबाईल बंद करून फरार झाला होता.
पोलिसांनी अटक केल्यानंतर गाडे याच्या बँक खाते, डिजिटल व्यवहार, ऑनलाईन पेमेंट या सगळ्याची सखोल चौकशी केली. दत्तात्रय गाडे याच्या मोबाईलमधून कोणाकोणाला पैसे ट्रान्सफर करण्यात आले? संबंधित तरुणीला पैसे देण्यात आले का? या सगळ्याचा तपास पोलिसांनी केला.
दत्तात्रय गाडे याने वकिलांमार्फत आपण पीडित तरुणीला महिनाभरापासून ओळखत होतो, असाही दावा केला होता. त्यामुळे या दोघांच्या फोन कॉलची चौकशी व्हावी, अशी मागणी दत्तात्रय गाडे याच्या वकिलांनी केली होती. त्यानुसार पुणे पोलिसांनी दत्तात्रय गाडे याला अटक केल्यानंतर त्याच्या आणि पीडितेच्या मोबाईलचे दोन वर्षांचे सीडीआर डिटेल्स तपासले आहेत. यामध्ये कुठेही संबंधित आरोपी आणि पीडिता हे एकमेकांच्या संपर्कात असल्याचे दिसून आलेले नाही, असे वृत्त ‘दैनिक लोकमत’ने सूत्रांच्या हवाल्याने दिले आहे.