संगमनेर, दि. १९ मार्च – प्रतिनिधी
छत्रपती शिवाजी महाराज हे अखंड जगाचे दैवत आहे. मात्र भाजप महायुतीने सातत्याने शिवाजी महाराजांचा अपमान केला आहे. शिवजयंतीच्या पार्श्वभूमीवर महायुतीने उभारलेल्या कमानीवर छत्रपती शिवाजी महाराजांची प्रतिमा होती. महाराजांची प्रतिमा लावलेली कमान पडणे हे दुर्दैव असून, यामुळे महाराजांच्या प्रतिमेचा अवमान झाला आहे. त्यामुळे या घटनेला जबाबदार असणाऱ्या आयोजकांवर तातडीने गुन्हे दाखल करावे, अशी मागणी माजी नगराध्यक्ष विश्वास मुर्तडक यांनी केली आहे.
फक्त राजकीय उद्देश ठेवून छत्रपती शिवाजी महाराजांची जयंती साजरी करणारे संगमनेरचे शिवसेनेचे स्थानिक लोकप्रतिनिधी व महायुतीचे समर्थक यांच्या गलथान कारभारामुळे कमान कोसळल्याची घटना बुधवारी घडली. शिवजयंती उत्सव समितीच्या माध्यमातून गेल्या सोळा वर्षांपासून छत्रपती शिवाजी महाराजांची जयंती सर्व राजकीय पक्ष व संघटना एकत्र येऊन साजरी करत होते. यामध्ये कधीही गटबाजी झाली नाही. यामुळे तालुक्यात एक वेगळी परंपरा निर्माण झाली होती.
मात्र यावर्षी महायुतीच्या पदाधिकाऱ्यांनी सत्तेचा गैरवापर करत प्रशासनावर दबाव टाकून शिवजयंती उत्सवासाठी परवानगी मिळविली. प्रशासन परवानगी देत नसतानाही संगमनेर बस स्थानक परिसरात महायुतीच्या वतीने कमान उभारण्यात आली होती. तसेच शिवजयंती मिरवणूक देखील काढण्यात आली मात्र या मिरवणुकीत कोणतीही सुरक्षितता नव्हती. रस्त्यावर राजकीय उद्देश समोर ठेवून उभारलेली कमान देखील सुरक्षित नव्हती. आयोजकांचेही याकडे लक्ष नव्हते. फ्लेक्स बाजी व सोशल मीडियावर दंग असणाऱ्या कार्यकर्त्यांनी देखील याकडे लक्ष दिले नसल्याचा आरोप होत आहे.
महायुतीच्या कार्यकर्त्यांकडून विनापरवानगी अनेक फ्लेक्स लावण्यात आले या फ्लेक्स बाजीवर नव्या महायुतीच्या कार्यकर्त्यांचा जोर असल्याने संगमनेर शहर या माध्यमातून विद्रूप होत आहे वेळोवेळी अनेक संघटनांनी विरोध सुद्धा केला असून प्रशासनही सत्ताधाऱ्यांचे गुलाम झाले असल्याने हे जाहिरात बाजी करणारे फ्लेक्स रस्त्यावर लोबकळत आहे.
ऐन गर्दीत कमान कुणाच्या अंगावर पडली असती तर मोठा अनर्थ झाला असता मात्र किरकोळ स्वरूपाचे दुखापत वगळता सुदैवाने कोणतीही गंभीर इजा झाली नाही. त्यामुळे आयोजकांवर गुन्हा दाखल करण्याची मागणी मुर्तडक यांच्यासह शिवप्रेमी व विविध संघटनांनी केली आहे.
