महाराष्ट्र संवाद न्यूज – संगमनेर
रोटरी क्लब ऑफ संगमनेरने नुकताच ‘श्रमप्रतिष्ठा सन्मान सोहळा’ आयोजित करून समाजातील कष्टकरी परंतु आपल्या मुलांना यशस्वीतेच्या शिखरावर पोहोचवण्यासाठी अथक परिश्रम घेतलेल्या पालकांना आदराने गौरवले. मालपाणी लॉन्स येथे झालेल्या या प्रेरणादायी कार्यक्रमात भावुक आणि गौरवास्पद वातावरण निर्माण झाले होते.
या सोहळ्याच्या अध्यक्षस्थानी रोटरी डिस्ट्रीक्ट ३१३२ चे गव्हर्नर रो. सुरेश साबू उपस्थित होते. प्रमुख पाहुणे म्हणून यशस्वी उद्योजक राजेश मालपाणी, असिस्टंट गव्हर्नर रो. विनोद पटणी, डिस्ट्रीक्ट सेक्रेटरी रो. राजेंद्र अग्रवाल आणि पब्लिक इमेज डायरेक्टर रो. रविंद्र बनकर उपस्थित होते.
या कार्यक्रमात पाच कुटुंबांचा सन्मान करण्यात आला, ज्यांनी अनेक अडचणींवर मात करत आपल्या मुलांना विविध क्षेत्रांमध्ये यशस्वी बनवले. या मुलांनी प्रशासन, महसूल, पोलीस, वैद्यकीय आणि औद्योगिक क्षेत्रात उल्लेखनीय यश संपादन केले आहे. सन्मानित पालकांमध्ये पालघरचे अपर जिल्हाधिकारी भाऊसाहेब फटांगरे यांच्या मातोश्री श्रीमती भागीरथीबाई गंगाधर फटांगरे, मुंबईचे जॉइंट कमिशनर, इन्कम टॅक्स एकनाथ अभंग यांच्या मातोश्री श्रीमती रुक्मिणीताई गणपत अभंग, आयपीएस अधिकारी मंगेश खिलारी यांचे पालक संगिता व पाराजी खिलारी, महिंद्रा कंपनीच्या प्रॉडक्शन मॅनेजर इंजि. मनिषा भालके यांच्या पालक सिता व बबन भालके आणि स्त्रीरोग तज्ज्ञ, एम.डी. (गोल्ड मेडलिस्ट) डॉ. ताईबाई गावडे यांच्या पालक सिंधुबाई व देवराम गावडे यांचा समावेश होता.
कार्यक्रमाची सुरुवात महाराष्ट्राच्या गौरवगीताने झाली, रो. राजेंद्र खोसे यांनी आपल्या मधुर आवाजात हे गीत सादर केले. यानंतर, यशस्वी मुलांनी आपल्या पालकांबद्दल कृतज्ञता व्यक्त करताना त्यांच्या खडतर प्रवासातील आठवणी उपस्थितांसमोर कथन केल्या.
यावेळी बोलताना राजेश मालपाणी म्हणाले की, “आई-वडील हेच आपले खरे मार्गदर्शक आणि गुरु असतात. त्यांच्या कष्टाचा आणि मार्गदर्शनाचा आदर केल्यास कोणतेही ध्येय साध्य करता येते.” रोटरी डिस्ट्रीक्ट गव्हर्नर रो. सुरेश साबू यांनी एकलव्य आणि द्रोणाचार्य यांच्या उदाहरणातून गुरु-शिष्य परंपरेचे महत्त्व विशद केले. त्यांनी संगमनेर रोटरी क्लबच्या या स्तुत्य उपक्रमाचे मनःपूर्वक कौतुक केले.
या कार्यक्रमाच्या यशस्वी आयोजनासाठी अध्यक्ष रो. साईनाथ साबळे, सचिव रो. विश्वनाथ मालाणी, खजिनदार रो. विकास लावरे, उपाध्यक्ष महेश वाकचौरे आणि प्रकल्प प्रमुख रो. सुनिल घुले यांच्यासह रो. महेश जाजू, रो. राजेंद्र खोसे, रो. नरेंद्र चांडक, रो. दीपक मणियार, रो. अजित काकडे, रो. रविंद्र पवार, रो. संजय लाहोटी, रो. अरविंद कासट, रो. पवनकुमार वर्मा, रो. डॉ. विनायक नागरे, रो. योगेश गाडे, रो. आनंद हासे, रो. डॉ. किशोर पोखरकर, रो. अमित पवार, रो. संतोष आहेर, रो. संकेत काजळे, रो. रवि ढेरंगे, रो. प्रमोद मणियार, रो. ओंकार सोमाणी, रो. मधुसूदन करावा, रो. सचिन पलोड, रो. रोहित नावंदर, रो. सौरभ म्हाळस, रो. मनमोहन वर्मा, सौ. मनोरमा साबळे आदी रोटरी सदस्यांनी विशेष परिश्रम घेतले. कार्यक्रमाचे प्रभावी सूत्रसंचालन रो. संजय राठी व रो. भारतभूषण नावंदर यांनी केले.
या सोहळ्याला सन्मानित पालकांचे कुटुंबीय, सुर्या करिअर अकॅडमीचे विद्यार्थी, रोटरी क्लबचे सदस्य आणि विविध क्षेत्रातील मान्यवर मोठ्या संख्येने उपस्थित होते. संघर्षातून यशाकडे जाणार्या या प्रेरणादायी कथा ऐकून उपस्थितांना गहिवरून आले आणि त्यांच्या मनात सन्मान व आदराची भावना दाटून आली.
