महाराष्ट्र संवाद न्यूज – पुणे
वाघोली येथील दहा एकर जमिनीच्या मालकी हक्कासाठी झालेल्या घोटाळ्यात चंदननगर पोलीस ठाण्याचे तत्कालीन वरिष्ठ पोलीस निरीक्षक राजेंद्र लांडगे यांच्यासह चौघांवर गुन्हा दाखल करण्यात आला आहे. आर्थिक फायद्यासाठी पदाचा गैरवापर करून कट रचल्याचा आरोप त्यांच्यावर आहे. या घटनेमुळे पुणे पोलीस दलात खळबळ माजली आहे.
मिळालेल्या माहितीनुसार, वाघोलीतील सुमारे दहा एकर जमीन हडपण्याच्या उद्देशाने आरोपींनी संगनमत केले. त्यांनी एका बनावट महिलेला मूळ मालक म्हणून उभे केले आणि या महिलेच्या माध्यमातून जमिनीच्या व्यवहारातून स्वतःचा आर्थिक फायदा करून घेतला, असा आरोप आहे. या प्रकरणी आनंद लालासाहेब भगत, शैलेश सदाशिव ठोंबरे, राजेंद्र लांडगे आणि अपर्णा यशपाल वर्मा यांच्या विरोधात चंदननगर पोलीस ठाण्यात गुन्हा नोंदवण्यात आला आहे.
चंदननगर पोलीस या प्रकरणाचा कसून तपास करत आहेत. या गुन्ह्याच्या मुळाशी जाण्यासाठी पोलीस सखोल चौकशी करत असून, बनावट कागदपत्रे आणि आर्थिक व्यवहारांची कसून तपासणी केली जात आहे. या गंभीर प्रकरणामुळे पोलीस यंत्रणेतील भ्रष्टाचाराचा मुद्दा पुन्हा एकदा चर्चेत आला आहे.
