संगमनेर, प्रतिनिधी:
संगमनेर येथील अतिरिक्त मुख्य न्यायदंडाधिकारी यांच्या न्यायालयाने सन २०१४ मधील घरफोडी आणि चोरीच्या एका प्रकरणात तीन आरोपींना संगमनेरचे ४ थे दिवाणी न्यायाधीश तथा अतिरिक्त मुख्य न्याय दंडाधिकारी जि. व. भेंडे साहेब यांनी दोषी ठरवले आहे. यात मुख्य आरोपी किशोर सावळेराम फुलवर आणि अक्षय बाळासाहेब डहाळे हे फरार असून या दोघांना प्रत्येकी दोन वर्ष, अमोल नंदुशेठ कुलथे याला सहा महिन्यांच्या कारावासाची शिक्षा सुनावण्यात आली आहे.
प्रकरणाची पार्श्वभूमी: २१ ऑगस्ट २०१४ रोजी सुभाष भिमाजी खेमनर यांनी आश्वी पोलीस ठाण्यात तक्रार दाखल केली होती. सकाळी ९:४५ वाजता ते आणि त्यांच्या पत्नी शाळेत गेले असता, सायंकाळी ५:३० वाजता घरी परतल्यावर त्यांना त्यांच्या बंगल्याच्या बेडरूमच्या खिडकीचे गज कापलेले आणि काचा फुटलेल्या दिसल्या. दुसऱ्या बेडरूममध्ये कपाटातून ६०,०००/- रुपये रोख आणि ८.५ तोळे सोन्याचे दागिने चोरी झाल्याचे त्यांच्या निदर्शनास आले.
या तक्रारीनुसार, आश्वी पोलिसांनी भारतीय दंड संहितेच्या कलम ४५४, ३८० आणि ४११ सहकलम ३४ अन्वये गुन्हा दाखल केला. तपास पूर्ण करून एकूण तीन आरोपींविरुद्ध न्यायालयात दोषारोपपत्र दाखल करण्यात आले. सरकारच्या वतीने सरकारी वकील प्रणव भामरे यांनी काम बघितले.
खटल्याच्या सुनावणीदरम्यान, आरोपी क्र. १ किशोर फुलवर आणि आरोपी क्र. ३ अक्षय डहाळे हे गैरहजर राहिले, त्यामुळे त्यांच्याविरुद्ध फौजदारी प्रक्रिया संहिता कलम ८२ व ८३ प्रमाणे जाहीरनामे काढण्यात आले. आरोपी क्र. २ अमोल कुलथे हजर असल्याने, त्याचा खटला वेगळा करून त्याच्याविरुद्ध पुरावा नोंदवण्यात आला, तर फरार आरोपींविरुद्ध कलम २९९ प्रमाणे पुरावा नोंदवला गेला.
तक्रारदार सुभाष भिमाजी खेमनर, तपासी अंमलदार तात्याराव यादवराव वाघमारे यांच्या साक्षी महत्त्वपूर्ण ठरल्या. सादर केलेले तोंडी आणि लेखी पुरावे तसेच युक्तिवाद लक्षात घेऊन न्यायालयाने या खटल्यामध्ये तिन्ही आरोपींना दोषी ठरविले. फरार आरोपी किशोर सावळेराम फुलवर याला भादंवि कलम ४५४ अन्वये दोन वर्षांचा सश्रम कारावास आणि ५००/- रुपये दंड. दंड न भरल्यास एक महिना साधा कारावास. तसेच भादंवि कलम ३८० अन्वये दोन वर्षांचा सश्रम कारावास आणि ५००/- रुपये दंड. दंड न भरल्यास एक महिना साधा कारावास तर आरोपी अमोल नंदुसेठ कुलथे याला भादंवि कलम ४११ अन्वये सहा महिन्यांचा सश्रम कारावास आणि ५००/- रुपये दंड. दंड न भरल्यास एक महिना साधा कारावासाची तर फरार आरोपी अक्षय बाळासाहेब डहाळे याला भादंवि कलम ४११ अन्वये दोन वर्षांचा सश्रम कारावास आणि ५००/- रुपये दंड. दंड न भरल्यास एक महिना साधा कारावासाची शिक्षा ठोठावली आहे.
तसेच तपासा दरम्यान या प्रकरणातील जप्त केलेला मुद्देमाल सोन्याची लगड, अंगठी, नेकलेस, टॉप्स, मंगळसूत्र, मणी, वेल आणि रोख रक्कम ६०,०००/- रुपये सुभाष भिमाजी खेमनर यांना सुपूर्द करण्याचे आदेश दिले आहेत. 
