संगमनेर, प्रतिनिधी:
सीआरपीएफ जवान संदीप घोडेकर यांचा कर्तव्य बजावत असताना मृत्यू झाला. देशसेवा बजावताना घोडेकर यांना वीरमरण आले आहे. त्यांनी देशाची केलेली सेवा उल्लेखनीय असल्याने त्यांचे संगमनेरात यथोचित स्मारक उभारण्याची मागणी करत यासाठी संगमनेरचे आमदार अमोल खताळ आणि जिल्ह्याचे पालकमंत्री राधाकृष्ण विखे पाटील यांच्याकडे पाठपुरावा करणार असल्याचे शिवसेनेचे (शिंदे)शहर प्रमुख विनोद सूर्यवंशी यांनी म्हटले आहे.
दिल्लीत कर्तव्य बजावत असताना जवान संदीप घोडेकर यांचा हृदयविकाराच्या झटक्याने मृत्यू झाला. बुधवारी हजारो शोकाकुल नागरिकांच्या उपस्थितीत संगमनेरमध्ये त्यांच्यावर शासकीय इतनामात अंत्यसंस्कार करण्यात आले. यावेळी श्रद्धांजली वाहताना सूर्यवंशी यांनी ही मागणी केली.
सामान्य कुटुंबात परिस्थितीवर मात करत संगमनेरकर असलेल्या संदीप घोडेकर यांनी सीआरपीएफ जवान म्हणून जम्मू काश्मीर, छत्तीसगड व दिल्ली येथे सेवा बजावली. सैन्य दलात कर्तव्य करत असताना त्यांना मरण आले, त्यांचे सीआरपीएफ मधील काम संगमनेरकरांसाठी मोठी अभिमानास्पद बाब आहे. त्यांचे योगदान संगमनेरकर कधीही विसरू शकत नाही.
अशा वीर योद्धाचे सातत्याने संगमनेरकरांना स्मरण रहावे व पुढील पिढीला त्यातून प्रेरणा मिळावी यासाठी संदीप घोडेकर यांचे संगमनेरमध्ये स्मारक होणे आवश्यक आहे. या स्मारकासाठी पाठपुरावा करणार असल्याचे सूर्यवंशी यांनी म्हटले आहे.
