महाराष्ट्र संवाद न्यूज ऑनलाईन वृत्त
बहिणीच्या मृत्यूस कारणीभूत ठरून जन्मठेपेची शिक्षा झालेल्या एका कैद्याला पोलिसांनी तब्बल सात वर्षांनी अटक केली आहे. विठ्ठल उर्फ सोनू प्रकाश काळवणे (रा. बीड) असे अटक केलेल्या आरोपीचे नाव आहे. रजेवर बाहेर आल्यानंतर पोलिसांना गुंगारा देऊन तो फरार झाला होता.
२०१४ मध्ये बीड येथे ही धक्कादायक घटना घडली होती. विठ्ठलला त्याच्या बहिणीचे प्रेमप्रकरण आणि प्रियकरासोबतचे लग्न मान्य नव्हते. यातून त्याने बहिणीला आणि तिच्या प्रियकराला रुग्णालयातच विष पाजून प्राणघातक हल्ला केला होता. दुर्दैवाने या हल्ल्यात बहिणीचा मृत्यू झाला, तर प्रियकर बचावला. या गुन्ह्यासाठी विठ्ठलला जन्मठेप आणि १० हजार रुपये दंडाची शिक्षा सुनावण्यात आली होती.
शिक्षा भोगत असताना विठ्ठल रजेवर बाहेर आला, परंतु त्यानंतर तो कारागृहात परतला नाही आणि पोलिसांचा ताबा चुकवून फरार झाला. शिवाजीनगर पोलीस ठाण्यात त्याच्याविरोधात गुन्हा दाखल करण्यात आला होता.
फरार आरोपींना पकडण्यासाठी पोलीस अधीक्षक नवनीत कॉवत यांनी विशेष मोहीम हाती घेतली आहे. या मोहिमेअंतर्गत अपर पोलीस अधीक्षक सचिन पांडकर यांच्या मार्गदर्शनाखाली बीड शहरचे पोलीस निरीक्षक शीतलकुमार बल्लाळ यांनी एक विशेष तपास पथक नियुक्त केले होते. उपनिरीक्षक महेश जाधव, हवालदार गहिनीनाथ बावनकर आणि अंमलदार राम पवार यांच्या पथकाने अथक प्रयत्नांनंतर फरार विठ्ठल उर्फ सोनू प्रकाश काळवणे याला गुरुवारी सायंकाळी शिताफीने ताब्यात घेतले. त्याला अटक करण्यात आली असून, पुढील कायदेशीर कार्यवाही करून न्यायालयात हजर करण्यात येणार आहे.
Post Views: 1,239
