महाराष्ट्र संवाद न्यूज ऑनलाईन
लाचखोरी करणाऱ्या एका माजी पोलीस उपनिरीक्षकास न्यायालयाने निवृत्तीनंतर दोन वर्षे सक्तमजुरी आणि १० हजार रुपयांच्या दंडाची शिक्षा सुनावली आहे. भरत गोपाळराव होळकर असे या निवृत्त उपनिरीक्षकाचे नाव असून, तो कराड शहर पोलीस ठाण्यात कार्यरत होता.
भरत गोपाळराव होळकर यांनी, कराड पोलीस ठाण्यात दाखल एका अहवालाची प्रत वरिष्ठांना पाठवण्यासाठी तक्रारदाराकडे सात हजार रुपयांची लाच मागितली होती. याप्रकरणी तक्रारदाराने लाचलुचपत प्रतिबंधक विभागाकडे (ACB) तक्रार दाखल केली होती.
त्यानंतर ACB च्या अधिकाऱ्यांनी लाच स्वीकारताना होळकर यांना २० जुलै २०१४ रोजी रंगेहाथ पकडले. या कारवाईसाठी कराड शहरातील पंचायत समितीजवळच्या एका रेस्टॉरंटसमोर सापळा रचण्यात आला होता.
या प्रकरणाची सुनावणी झाल्यानंतर, कराडचे अतिरिक्त जिल्हा व सत्र न्यायाधीश बी. बी. पतंगे यांनी होळकर यांना दोषी ठरवले. त्यांना दोन वर्षे सक्तमजुरी आणि पाच हजार रुपये दंड, तसेच दंड न भरल्यास अतिरिक्त तीन महिने सक्तमजुरीची शिक्षा ठोठावण्यात आली आहे.
या प्रकरणी सरकारी वकील एम. व्ही. कुलकर्णी यांनी कामकाज पाहिले, तर तत्कालीन पोलीस निरीक्षक वैशाली पाटील यांनी या प्रकरणी तपास करून न्यायालयात दोषारोपपत्र दाखल केले होते. लाचलुचपत प्रतिबंधक विभागाच्या पोलीस हवालदार रमेश वीरकर यांनी सहकार्य केले.
