महाराष्ट्र संवाद न्यूज ऑनलाईन
माहेराहून २० लाख रुपये आणण्यासाठी सासरच्या त्रासाला कंटाळून स्नेहा विशाल झेंडगे (वय २७) या विवाहितेने आत्महत्या केल्याची धक्कादायक घटना पुण्यात घडली आहे. वैष्णवी हगवणे आत्महत्या प्रकरणाची घटना ताजी असतानाच हा प्रकार समोर आल्याने आमदार रोहित पवार यांनी समाजाने यातून कोणताही धडा घेतला नसल्याची खंत व्यक्त केली आहे.
पोलिसांनी दिलेल्या माहितीनुसार, स्नेहा झेंडगे आणि विशाल यांचा विवाह गेल्या वर्षी २ मे २०२४ रोजी झाला होता. लग्नानंतर काही दिवसांतच सासरच्या मंडळींनी स्नेहाकडे कंपनी चालवण्यासाठी माहेरहून २० लाख रुपये आणण्याचा तगादा लावला. या पैशांसाठी तिचा शारीरिक आणि मानसिक छळ करण्यात आला.
https://x.com/RRPSpeaks/status/1954558051442434467?t=uA3sdevQQ7sWZSaRCYw82A&s=19
छळाला कंटाळून स्नेहाने याआधीही पोलिसांत तक्रार दाखल केली होती. मात्र, सासरचे नातेवाईक भाऊसाहेब कोल्हाळ यांनी तिला धमकावून तक्रार मागे घ्यायला लावली. त्यानंतरही तिचा छळ सुरूच राहिला. राखी पौर्णिमेच्या दिवशी भावाला बोलावल्यास त्याला जीवे मारण्याची धमकीही तिला देण्यात आली होती. या त्रासाला कंटाळून स्नेहाने ९ ऑगस्ट रोजी रात्री राहत्या घरी गळफास घेऊन आत्महत्या केली.
रोहित पवारांची भावनिक पोस्ट या घटनेनंतर आमदार रोहित पवार यांनी सोशल मीडियावर पोस्ट शेअर करून आपल्या भावना व्यक्त केल्या. त्यांनी म्हटले आहे की, वैष्णवी हगवणे प्रकरणात समाजाने कोणताही धडा घेतलेला दिसत नाही. लग्नानंतर अवघ्या दीड वर्षात एका विवाहितेला अशा प्रकारे जीव गमवावा लागत असेल तर या घटनेला कारणीभूत असलेल्या प्रत्येकाला कठोर शिक्षा झाली पाहिजे.
स्नेहाच्या वडिलांच्या फिर्यादीनुसार, भारती विद्यापीठ पोलिसांनी या प्रकरणी तिचा पती विशाल झेंडगे आणि इतर नातेवाईकांवर भारतीय न्याय संहिता कलम १०८, ८५, ११५ (२) सह इतर कलमांखाली गुन्हा दाखल केला आहे. या प्रकरणाचा पुढील तपास पोलीस करत आहेत.
