१५ वर्षीय मुलीवर सामूहिक बलात्कार प्रकरणी ६ जणांविरोधात गुन्हा दाखल

महाराष्ट्र संवाद न्यूज ऑनलाईन

एका १५ वर्षीय अल्पवयीन मुलीवर सामूहिक बलात्कार केल्याप्रकरणी सहा जणांविरोधात गुन्हा दाखल करण्यात आला आहे. या प्रकरणात पाच अल्पवयीन आरोपींना बालसुधारगृहात पाठवण्यात आले असून, २७ वर्षीय मुख्य आरोपीला अटक करण्यात आली आहे.

मिळालेल्या माहितीनुसार, मुंबईतील काळाचौकी येथे पोलीस ठाण्यात या संदर्भात आरोपी विरोधात गुन्हा दाखल करण्यात आला आहे. पीडित मुलगी सुमारे १४ वर्षे नऊ महिन्यांची आहे. गेल्या वर्षी १ ऑक्टोबर रोजी १७ वर्षांच्या एका अल्पवयीन आरोपीने पीडित मुलीसोबत जवळीक साधली. त्यानंतर तो तिला २७ वर्षीय आरोपीच्या घरी घेऊन गेला, जिथे दोघांनी तिच्यावर बलात्कार केला आणि त्याचे व्हिडिओ चित्रीकरणही केले. नंतर या आरोपींनी पीडितेला धमकावून अश्लील व्हिडिओ पाठवण्यास भाग पाडले. या व्हिडिओंचा वापर करून, इतर चार अल्पवयीन आरोपींनीही तिच्यावर अत्याचार केले.

हा धक्कादायक प्रकार एका अल्पवयीन आरोपीच्या प्रेयसीमुळे उघडकीस आला. संबंधित अल्पवयीन आरोपी आणि पीडित मुलीचे प्रेमसंबंध असल्याचा संशय आल्याने त्या प्रेयसीने पीडितेच्या घरी जाऊन तिच्या आईला याबाबत सांगितले. त्यावेळी पीडितेच्या आईने तपासणी केली असता, मुलीच्या फोनमध्ये अश्लील व्हिडिओ आढळले. आईने मुलीला विचारणा केली असता, तिने घडलेला सर्व प्रकार सांगितला.

या गंभीर गुन्ह्याची माहिती मिळताच, पोलिसांनी तात्काळ कारवाई केली. सर्व आरोपी आणि पीडित मुलगी एकमेकांचे परिचित आहेत. पोलिसांनी आरोपींचे मोबाइल जप्त केले असून, न्यायवैद्यक तज्ज्ञांच्या मदतीने पुढील तपास सुरू आहे. या प्रकरणाच्या गांभीर्यामुळे पोलिसांनी त्वरित पावले उचलली असून, पीडितेला न्याय मिळवून देण्यासाठी तपास वेगाने सुरू आहे.