महाविद्यालयीन तरुणीवर अत्याचार प्रकरणी आरोपीला दहा वर्षाचा कारावास, संगमनेर न्यायालयाचा महत्त्वपूर्ण निर्णय

महाराष्ट्र संवाद न्यूज ऑनलाईन 

संगमनेर, प्रतिनिधी: अल्पवयीन महाविद्यालयीन तरुणीवर लैंगिक अत्याचाराचा आरोप सिद्ध झाल्याने संगमनेरच्या जिल्हा व अतिरिक्त सत्र न्यायालयाने आरोपीला दहा वर्षाच्या सश्रम कारावासाची शिक्षा ठोठावली आहे. 

बाळासाहेब जगन्नाथ रोकडे (वय ३२ वर्ष रा. श्रीरामनगर संगमनेर) असे शिक्षा झालेल्या आरोपीचे नाव आहे. जिल्हा व अतिरिक्त सत्र न्यायाधीश डी. एस. घुमरे यांच्या न्यायालयासमोर या खटल्याची सुनावणी सुरू होती. दोन्ही बाजूचा युक्तिवाद ऐकल्यानंतर न्यायालयाने मंगळवारी निर्णय जाहीर करत आरोपीला खटल्यात दोषी ठरविले.

१७ मार्च २०१९ रोजी पीडित अल्पवयीन महाविद्यालयीन तरुणी मैत्रिणीचे बँकेत काम असल्याचे कारण सांगून तिच्यासोबत संगमनेर मधील युनियन बँकेत गेली होती. मात्र ही घरी न परतल्याने मैत्रिणीकडे चौकशी केली असता तिने बँकेतील काम झाल्यानंतर पीडित तरुणी घरी गेल्याचे सांगितले. मात्र उशिरापर्यंत तरुणी घरी न परतल्याने तिचा शोध घेतला असता ती कोठेही आढळून आली नाही.

अल्पवयीन तरुणी आढळून आल्याने तिच्या आईने या संदर्भात संगमनेर शहर पोलीस ठाण्यात मुलीला अज्ञात व्यक्तीने पळवून नेल्याची तक्रार दाखल केल्यानंतर पीडित मुलीने अनोळखी नंबर वरून आईला फोन करत आपण नालासोपारा येथे असल्याची माहिती दिली होती. त्यानंतर तिच्या आईने तिला जवळच्या पोलीस ठाण्यात जाण्यास सांगितले. स्थानिक नागरिकांच्या मदतीने तरुणी नालासोपारा पोलीस ठाण्यात गेली त्यानंतर संगमनेर पोलिसांच्या मदतीने तिला संगमनेर येथे आणण्यात आले होते. 

पोलिसांनी तरुणीचा जबाब घेतला असता धक्कादायक माहिती समोर आली. तरुणीची मैत्रीण व आरोपीने तिला बँकेत न नेता गार्डनमध्ये नेले होते. तेथे तिला ज्यूस मधून कोणते तरी मादक द्रव्य पिण्यास दिल्याने तिला त्रास होऊ लागला व चक्कर आल्यासारखे वाटू लागले. त्यानंतर रात्री दहा वाजण्याच्या दरम्यान तिला जाग आली असता ती पुण्यातील एका लॉजवर होती. त्यानंतर जेवण करून ती पुन्हा झोपी गेली. सकाळी झोपेतून उठल्यानंतर आपल्या पायाला ओरखडले गेल्याचे तिच्या लक्षात आले. त्यानंतर तरुणीने मैत्रिणीला घरी जायचे असल्याचे सांगितले. 

त्यानंतर पीडित तरुणी, तिची मैत्रीण, आरोपी आणि त्याचा मित्र असे चौघेजण रेल्वेने नालासोपारा येथे गेले. तेथे आरोपीने रात्री तरुणीवर अत्याचार केल्याची माहिती पीडित तरुणीने दिल्यानंतर पुरवली जबाबाच्या आधारे आरोपी विरुद्ध भारतीय दंड विधान संहिता कलम ३७६, पोक्सो ४, ६ या वाढीव कलमातर्गत गुन्हा दाखल केला. तत्कालीन पोलीस उपनिरीक्षक अभिजीत लांडे यांनी या प्रकरणी तपास करून न्यायालयात आरोपी विरुद्ध आरोप पत्र दाखल केले होते.

न्यायाधीश डी. एस. घुमरे यांच्यासमोर या खटल्याची सुनावणी झाली. सरकार पक्षाच्या वतीने अतिरिक्त सरकारी अभियोक्ता मच्छिंद्र गवते यांनी काम पाहिले. न्यायालयासमोर सरकार पक्षातर्फे सहा साक्षीदारांच्या साक्षी नोंदविण्यात आल्या. यात पीडित तरुणीसह महिला वैद्यकीय अधिकारी लोहारे यांची साक्ष महत्त्वाची ठरली. सरकारी वकील गवते यांनी आरोपीने पीडित तरुणीवर पुणे आणि नालासोपारा येथे अत्याचार केल्याची बाब न्यायालयाच्या निदर्शनास आणून दिली.

न्यायाधीश डी. एस. घुमरे यांनी या खटल्यात आरोपी बाळासाहेब जगन्नाथ रोकडे याला विविध गुन्ह्यांमध्ये दोषी ठरवत दहा वर्ष सश्रम कारावास, सात हजार रुपये दंड आणि दंड न भरल्यास आणखी एक वर्ष कारावासाची शिक्षा सुनावली.

या खटल्यात पैरवी अधिकारी सहाय्यक फौजदार प्रवीण डावरे, महिला पोलीस कॉन्स्टेबल स्वाती नाईकवाडी, दिपाली राहणे, पंडित व साबळे यांनी सरकार पक्षाला मदत केली.