शेअर मार्केटमध्ये मोठा गंडा: गुंतवणूकदारांचे ५० लाख रुपये बुडाले

महाराष्ट्र संवाद न्यूज ऑनलाईन

अहिल्यानगर: शेअर मार्केटमध्ये आकर्षक परतावा मिळवून देण्याचे आमिष दाखवून अहिल्यानगरमध्ये तब्बल ५० लाख रुपयांची फसवणूक झाल्याचे उघड झाले आहे. या प्रकरणी विशाल तुकाराम चव्हाण आणि कृष्णा दगडू शिंदे यांच्या विरोधात तोफखाना पोलीस ठाण्यात गुन्हा दाखल करण्यात आला आहे. यामध्ये, अर्जुन गिते यांची २५.५ लाख रुपये आणि इतर तीन जणांची २५ लाख रुपयांची फसवणूक झाली आहे.

तक्रारदार अर्जुन गिते यांची २०२२ मध्ये आरोपी विशाल चव्हाण याच्याशी ओळख झाली होती. विशालने ‘व्ही.सी. इन्व्हेस्टमेंट’ या नावाने शेअर मार्केट कंपनी सुरू केल्याचे सांगितले. त्याने इन्स्टाग्राम आणि फेसबुकवर नफ्याचे आकर्षक व्हिडिओ दाखवून गिते यांच्यासह स्नेहा जोशी, शीतल चव्हाण, आनंद जोशी, आणि अजिनाथ पाडळकर यांचा विश्वास संपादन केला. सुरुवातीला ३०-४०% नफ्याचे आमिष दाखवून गुंतवणूकदारांना आकर्षित केले.

विशालच्या आश्वासनांना बळी पडून अर्जुन गिते यांनी नोव्हेंबर-डिसेंबर २०२४ या काळात २५.५ लाख रुपयांची मोठी रक्कम गुंतवली. विशालने सुरुवातीला १०% परतावा देण्याचे आश्वासन दिले, परंतु फेब्रुवारी २०२५ नंतर त्याने परतावा देणे बंद केले. गिते यांनी आपली रक्कम परत मागितल्यावर विशालने शेअर मार्केटमध्ये मंदी असल्याचे कारण सांगून टाळाटाळ केली. मार्च २०२५ मध्ये त्याने नोटरी करारनामा करूनही पैसे दिले नाहीत. या गुन्ह्यात सामील असलेला दुसरा आरोपी कृष्णा दगडू शिंदे याने निंबोडी येथील प्लॉट विक्रीचे आमिष दाखवूनही पैसे परत केले नाहीत.

या टोळीने अशाच प्रकारे ४०-५० गुंतवणूकदारांना फसवल्याचा संशय पोलिसांनी व्यक्त केला आहे. या प्रकरणाचा पुढील तपास तोफखाना पोलीस ठाण्याचे सहायक पोलीस निरीक्षक वारुळे अधिक तपास करत आहेत.