अहिल्यानगर – ओबीसी समाजाच्या न्याय हक्कांसाठी राज्यभर दौरा करत असलेले ओबीसी नेते लक्ष्मण हाके यांच्या वाहनावर आज (शनिवारी) अहिल्यानगर जिल्ह्यात अज्ञातांकडून दगडफेक करण्यात आल्याची धक्कादायक घटना घडली आहे. या हल्ल्यात हाके यांच्या गाडीचे किरकोळ नुकसान झाले आहे.
या घटनेमुळे परिसरात काही काळ तणावाचे वातावरण निर्माण झाले होते. घटनेची माहिती मिळताच पोलिसांनी तातडीने घटनास्थळी धाव घेतली आणि जमावाला पांगवून परिस्थिती नियंत्रणात आणली. सुदैवाने या दगडफेकीत लक्ष्मण हाके यांना कोणतीही दुखापत झालेली नाही.
पाथर्डी तालुक्यातील दैत्य नांदूर येथे ओबीसी एल्गार सभेचे आयोजन करण्यात आले होते. या सभेसाठी सहकाऱ्यांसाठी जात होते. नगर जवळील अरणगाव येथे दौरा सुरू असताना अचानक काही अज्ञात व्यक्तींनी त्यांच्या वाहनावर दगडफेक करण्यास सुरुवात केली. हल्ल्यात कारचे नुकसान झाले असून हाके बचावले आहेत. हा हल्ला पूर्वनियोजित होता की अचानक घडला, तसेच हा हल्ला नेमका कोणी आणि कोणत्या उद्देशाने केला, याबाबत अद्याप स्पष्ट माहिती मिळू शकलेली नाही.
या घटनेनंतर ओबीसी संघटनांमध्ये तीव्र संतापाचे वातावरण असून, त्यांनी या भ्याड हल्ल्याचा निषेध केला आहे. पोलिसांनी तातडीने हल्लेखोरांना अटक करून त्यांच्यावर कठोर कायदेशीर कारवाई करावी, अशी मागणी ओबीसी नेत्यांकडून करण्यात येत आहे. पोलिसांनी अज्ञात व्यक्तींविरोधात गुन्हा दाखल केला असून, या प्रकरणाचा पुढील तपास सुरू आहे.
Views: 407
