महाराष्ट्र संवाद न्यूज ऑनलाईन
दसरा आणि महात्मा गांधी जयंतीनिमित्त घोषित केलेल्या मद्य विक्री बंदीच्या दिवशीही नियम मोडत अवैध विक्री करणाऱ्या व्यापाऱ्यांवर राज्य उत्पादन शुल्क विभागाने मोठी धडक कारवाई केली आहे. विभागाने श्रीरामपूर शहरातील दोन वाईन शॉपवर छापे टाकून १२,४४,३४५/- किमतीचा अवैध मद्यसाठा व मुद्देमाल जप्त केला आहे. या कारवाईत किशोर भूतकर, अनिल भूतकर, आणि अरुण अक्षय काळे या तिघांना अटक करण्यात आली आहे.
या कारवाईमुळे शहरातील अवैध मद्य विक्रेत्यांमध्ये खळबळ उडाली आहे. विशेष म्हणजे, छाप्यांमध्ये सापडलेले ‘सेंट्रल वाईन्स शॉप’ हे एका माजी नगरसेवकाच्या नावावर असल्याने राजकीय आणि सामाजिक वर्तुळात या कारवाईची जोरदार चर्चा सुरू आहे.
राज्य उत्पादन शुल्क विभागाच्या भरारी पथकाने एकाच दिवशी श्रीरामपूर शहरातील दोन वेगवेगळ्या ठिकाणी छापे टाकले. विभागाला मिळालेल्या माहितीनुसार, शहरातील ‘नितीन वाईन्स’ आणि ‘सेंट्रल वाईन्स शॉप’ मधून बंदीच्या दिवशीही मद्याचा साठा विक्रीसाठी बाहेर काढण्यात आला होता. उत्पादन शुल्क विभागाच्या भरारी पथकाला याची माहिती मिळताच त्यांनी तत्काळ कारवाईची योजना आखली.
या छाप्यात देशी आणि विदेशी मद्याचा अवैध साठा, त्यासंबंधित बिलबुक, तसेच वाहतुकीसाठी वापरली जाणारी साधने जप्त करण्यात आली. एकूण ₹१२,४४,३४५/- किमतीचा दारूचा साठा आणि मुद्देमाल जप्त करण्यात आला आहे. प्राथमिक चौकशीत उघड झाले आहे की, या दुकानांतून बंदीच्या दिवशीही मद्य विक्री केली जात होती.
या कारवाईतील सर्वात महत्त्वाचा मुद्दा म्हणजे सेंट्रल वाईन शॉप हे एका माजी नगरसेवकाच्या नावावर असल्याचे उघडकीस आले आहे. नियमांचे पालन करण्याची जबाबदारी असलेल्या माजी नगरसेवकांच्याच दुकानातून बंदीच्या दिवशी मद्यविक्री होत असल्याची बाब समोर आल्याने नागरिकांनी संताप व्यक्त केला आहे.
अटक करण्यात आलेल्या तिन्ही आरोपींविरुद्ध मद्यविक्री बंदीचे उल्लंघन, अवैध साठा ठेवणे आणि विक्री याबाबत संबंधित कलमान्वये गुन्हे दाखल करण्यात आले असून, पुढील चौकशी सुरू आहे. राज्य उत्पादन शुल्क विभागाचे उपआयुक्त सागर धोमकर, अहिल्यानगर जिल्ह्याचे अधीक्षक प्रमोद सोनवणे, उपअधीक्षक प्रवीणकुमार तेली, तसेच श्रीरामपूर भरारी पथक क्रमांक २ चे निरीक्षक अनुपकुमार देशमाने यांच्या मार्गदर्शनाखाली दुय्यम निरीक्षक संदीप मांडवेकर, जवान उद्धव काळे, सचिन बटुळे, महिला जवान आर. काळापहाड आदींच्या पथकाने ही धडक कारवाई केली.
राज्य उत्पादन शुल्क विभागाच्या भरारी पथक क्रमांक २ चे निरीक्षक अनुपकुमार देशमाने यांनी स्पष्ट केले की, सणासुदीच्या काळात बंदीचे उल्लंघन करणाऱ्यांवर अशाच प्रकारे काटेकोर कारवाया सुरू राहतील. शहरातील कोणतीही अवैध विक्री सहन केली जाणार नाही. नागरिकांनी संशयास्पद हालचालीबाबत विभागाला तात्काळ कळवावे, असे आवाहनही त्यांनी केले आहे. या कारवाईमुळे शहरातील अवैध मद्य विक्रेत्यांचे धाबे दणाणले आहेत.
राज्य उत्पादन शुल्क विभागाची मोठी कारवाई; २ वाईन शॉपवर छापे, लाखोंचा मुद्देमाल जप्त
सणासुदीच्या काळात बंदीचे उल्लंघन करणाऱ्यांवर अशाच प्रकारे काटेकोर कारवाया सुरू राहतील. शहरातील कोणतीही अवैध विक्री सहन केली जाणार नाही. नागरिकांनी संशयास्पद हालचालीबाबत विभागाला तात्काळ कळवावे, असे आवाहनही केले आहे
