चेक बाऊन्स प्रकरणी ट्रान्सपोर्ट व्यावसायिकाला कारावासाची शिक्षा

संगमनेर, प्रतिनिधी- 

व्यावसायिक कामासाठी घेतलेली हातउसनवार रक्कम परत करण्यासाठी दिलेला धनादेश (चेक) बँकेत न वटल्याने संगमनेर येथील अतिरिक्त मुख्य न्यायदंडाधिकारी चं. प्र. रघुवंशी यांच्या न्यायालयाने एका ट्रान्सपोर्ट व्यावसायिकाला दोषी ठरवून शिक्षा सुनावली आहे. परक्राम्य संलेख अधिनियमाच्या कलम १३८ अन्वये हा महत्त्वपूर्ण निकाल देण्यात आला आहे.

या प्रकरणातील फिर्यादी ज्ञानेश्वर माधव वर्पे हे संगमनेर शहरात ‘वर्पे इन्श्युरन्स अँड मल्टी सर्विसेस’ नावाचा व्यवसाय करतात. आरोपी सागर भाऊसाहेब गोपाळे (वय ३८ वर्ष, रा. धांदरफळ बुद्रुक) यांचा ‘श्री स्वामी समर्थ ट्रान्सपोर्ट’ नावाचा व्यवसाय असून गाड्यांच्या विम्याच्या कामामुळे या दोघांचा परिचय झाला होता. जून २०२२ मध्ये आरोपीने आपल्या ट्रान्सपोर्ट व्यवसायासाठी फिर्यादीकडून १ लाख २५ हजार रुपये हातउसनवार घेतले होते आणि ही रक्कम दोन महिन्यांत परत करण्याचे आश्वासन दिले होते.

ठरलेली मुदत संपल्यानंतर फिर्यादीने रक्कमेची मागणी केली असता आरोपीने येस बँकेचा १ लाख २५ हजार रुपयांचा धनादेश दिला. फिर्यादीने सदर चेक बँकेत जमा केला असता तो ‘खाते बंद’ (Account Closed) असल्याच्या शेऱ्यासह दोनदा परत आला. यानंतर फिर्यादीने वकिलामार्फत नोटीस पाठवूनही आरोपीने रक्कमेची पूर्तता न केल्याने न्यायालयात धाव घेतली.

न्यायालयीन सुनावणी दरम्यान आरोपीने आपण पैसे व्याजाने घेतले होते आणि ते विविध हप्त्यांमध्ये परत केले असल्याचा बचाव मांडला. मात्र, रक्कम परत केल्याचा कोणताही ठोस पुरावा, बँक पावती किंवा साक्षीदार आरोपीला न्यायालयात सादर करता आला नाही. उलट उलटतपासणी दरम्यान आरोपीने फिर्यादीशी तडजोड करण्याची आणि विषय संपवण्याची तयारी दर्शवली, ज्यावरून रक्कम देणे बाकी असल्याचे अप्रत्यक्षपणे सिद्ध झाले.

दोन्ही बाजूंचा युक्तिवाद आणि पुरावे तपासून अतिरिक्त मुख्य न्यायदंडाधिकारी चं. प्र. रघुवंशी यांनी आरोपी सागर भाऊसाहेब गोपाळे याला कलम १३८ अन्वये दोषी ठरवले. न्यायालयाने आरोपीला तीन महिने साध्या कारावासाची शिक्षा आणि दोन लाख रुपये दंड ठोठावला आहे. तसेच दंडाची रक्कम दोन महिन्याचा आत नाही दिल्यास आरोपीला एक महिने साध्या कारावासाची शिक्षा भोगावी लागणार आहे. न्यायालयाने आदेश केलेल्या दोन लाख रुपयांपैकी १ लाख ७५ हजार रुपये फिर्यादीला व २५ हजार रुपये सरकार जमा करण्याचे आदेश दिले आहे.

या प्रकरणात फिर्यादीतर्फे वकील श्री. व्ही. आर. पगारे यांनी काम पाहिले, त्यांना ॲड. सुनिता जाधव, ॲड. मोहिनी जगताप व ॲड. मनीषा गुंजाळ यांनी मदत केली.