संगमनेर | प्रतिनिधी:
संगमनेर तालुक्यातील हिवरगाव पावसा येथील देवगड देवस्थान ते देवतळे येथील खंडोबा देवस्थान जोडणारा ऐतिहासिक शिवरस्ता अखेर खुला झाला आहे. अनेक वर्षांपासून बंद असलेला हा रस्ता आमदार अमोल खताळ यांच्या विशेष प्रयत्नांमुळे आणि महसूल विभागाच्या तत्परतेमुळे अवघ्या एका वर्षात वाहतुकीसाठी सज्ज झाला असून, आमदारांनी चंपाषष्ठीच्या निमित्ताने दिलेले आश्वासन पूर्ण केले आहे.
हिवरगाव पावसा, निमगाव टेंभी आणि देवगाव या गावांमधून जाणारा हा शिवरस्ता बंद असल्याने खंडोबा भक्तांना दर्शनासाठी मोठा वळसा घालावा लागत होता. गेल्या वर्षी चंपाषष्ठी उत्सवासाठी देवतळे येथे आले असता, रामभाऊ रहाणे, ज्ञानदेव रहाणे, किशोर रहाणे, संजय रहाणे आणि जालिंदर पावसे या भक्तांनी आमदार खताळ यांच्याकडे हा रस्ता खुला करण्याची मागणी केली होती. त्यावर आमदारांनी एका वर्षात रस्ता खुला करून देऊ, असा शब्द दिला होता.
आमदार खताळ यांनी दिलेल्या सूचनेनुसार तहसीलदार धीरज मांजरे यांनी तात्काळ हालचाली सुरू केल्या. महसूल मंडळ अधिकारी आरती साठे आणि तलाठी मयुरी मुन्तोडे यांनी स्थळ पाहणी करून अहवाल सादर केला. तहसीलदार मांजरे यांनी प्रत्यक्ष शेतात जाऊन शेतकऱ्यांशी संवाद साधला आणि सामोपचाराने प्रश्न सोडवण्यासाठी पुढाकार घेतला.
या रस्त्याच्या मार्गात देवगाव येथील संतोष बाबासाहेब कोटकर व लक्ष्मण बबन कोटकर यांची जमीन येत होती. रस्ता होणे किती गरजेचे आहे, हे प्रशासनाने पटवून दिल्यानंतर कोटकर बंधूंनी सामाजिक बांधिलकी जपत आपल्या शेतातून रस्ता नेण्यास संमती दिली. त्यांच्या या सहकार्यामुळेच या कामातील सर्वात मोठा अडथळा दूर झाला.
महसूल विभागाने अत्यंत नियोजनबद्ध पद्धतीने काम करत अवघ्या एका दिवसात सुमारे २ ते २.५ किलोमीटर लांबीचा शिवरस्ता प्रत्यक्ष जमिनीवर तयार करून दिला. यामुळे परिसरातील नागरिकांमध्ये आनंदाचे वातावरण आहे. रस्ता खुला झाल्यामुळे आता देवगड आणि देवतळे या दोन तीर्थक्षेत्रांमधील अंतर कमी झाले असून, खंडोबा भक्तांनी आमदार अमोल खताळ आणि महसूल प्रशासनाचे मनापासून आभार मानले आहेत.
हा रस्ता खुला करण्यासाठी देवगावचे पोलीस पाटील अजय पावसे, माधव लामखडे, भास्कर शिंदे, सुनील शिंदे, संतोष शिंदे, रमेश वर्पे, काशिनाथ पावसे, सरपंच सुभाष गडाख, गणेश दवंगे आणि दशरथ पावशे यांनी विशेष परिश्रम घेतले.
