संगमनेर, प्रतिनिधी-
शहराच्या सामाजिक आणि राजकीय क्षेत्रातील एक व्यक्तिमत्व, शिवसेनेचे संगमनेर मधील पहिले नगरसेवक, स्वर्गीय धर्मवीर आप्पा केसेकर यांच्या स्मृती प्रीत्यर्थ संगमनेर नगर परिषदेने एक मोठा निर्णय घेण्याचे संकेत दिले आहेत. संगमनेर नगर परिषद कार्यालय ते कॅप्टन लक्ष्मी चौक या मुख्य रस्त्याला आता ‘स्वर्गीय धर्मवीर आप्पा केसेकर’ यांचे नाव दिले जाणार आहे.
कैलास (आप्पा) केसेकर यांच्या दशक्रिया विधीवेळी रविवारी श्रद्धांजली वाहताना सभेत माजी नगराध्यक्ष तथा विद्यमान नगरसेवक विश्वासराव मुर्तडक यांनी ही घोषणा केली. यावेळी बोलताना मुर्तडक भावूक झाले होते. केसेकर यांच्या निधनाने शहराने एक अभ्यासू आणि जनसामान्यांशी नाळ जोडलेला नेता गमावल्याची भावना यावेळी उपस्थित जनसमुदायाने व्यक्त केली.
आप्पा केसेकर यांनी नगरसेवक म्हणून काम करताना प्रशासनावर असलेली पकड आणि जनसामान्यांच्या प्रश्नांची जाण, सभागृहात सामान्यांचे मांडलेले प्रश्न यामुळे आपली एक वेगळी ओळख निर्माण केली होती. संगमनेरच्या विकासात त्यांचा सक्रिय सहभाग असायचा.
हा रस्ता शहराच्या मुख्य वर्दळीचा भाग असून, नगर परिषद आणि कॅप्टन लक्ष्मी चौक या दोन महत्त्वाच्या ठिकाणांना जोडतो. या रस्त्यावरच साळीवाडा भागात केसेकर यांचे निवासस्थान आहे. या रस्त्याला आप्पांचे नाव मिळाल्यास त्यांच्या कार्याची आठवण शहराच्या हृदयात कायमस्वरूपी कोरली जाईल. यासंबंधीचा अधिकृत ठराव लवकरच संगमनेर नगर परिषदेच्या सर्वसाधारण सभेत (कौन्सिल) मंजूर केला जाणार असल्याची माहिती मुर्तडक यांनी दिली आहे.
या निर्णयामुळे शिवसेनेचे पहिले नगरसेवक व धर्मवीर म्हणून परिचित असलेले आप्पा केसेकर यांच्या स्मृती जतन होणार आहे. यामुळे केसेकर प्रेमी आणि संगमनेरकरांमध्ये समाधानाचे वातावरण असून, एका खऱ्या लोकप्रतिनिधीचा हा उचित सन्मान ठरेल, अशी चर्चा शहरात सुरू आहे.
📌 आप्पा केसेकर हे केवळ माझे सहकारी नव्हते, तर ते शहराच्या विकासाचे साक्षीदार होते. मी नगराध्यक्ष असताना त्यांनी नगरसेवक म्हणून दिलेले योगदान अमूल्य आहे. त्यांच्या कार्याचा गौरव म्हणून या महत्त्वाच्या रस्त्याला त्यांचे नाव देण्याचा ठराव आम्ही नगर परिषदेच्या आगामी कौन्सिलमध्ये मांडणार आहोत.
— विश्वास मुर्तडक, माजी नगराध्यक्ष तथा विद्यमान नगरसेवक.
