झरेकाठी वार्ताहर:
संगमनेर तालुक्यातील झरेकाठी येथील आकांक्षा रवींद्र निकम ही तरुणी अहिल्यानगर येथे कामानिमित्त जात असताना झालेल्या भीषण अपघातात गंभीर जखमी झाली आहे. अपघातात तिला गंभीर दुखापत झाली असून सध्या तिच्यावर अहिल्यानगरमधील झोपडी कॅन्टीन परिसरातील मॅक्स सुपर हॉस्पिटलमध्ये अतिदक्षता विभागात उपचार सुरू आहेत.
आकांक्षा बोल्हेगाव फाटा येथील एमआयडीसीमध्ये कंपनीच्या कामासाठी जात असताना, एका भरधाव मोटरसायकलने आणि विटांनी भरलेल्या डंपरने तिला जोरदार धडक दिली. या अपघाताची भीषणता मोठी असून डंपर चालक घटनास्थळावरून पळून गेला आहे, तर संबंधित मोटरसायकल चालक मदत करण्यास टाळाटाळ करत असल्याची माहिती समोर आली आहे.
याप्रकरणी आकांक्षाचे वडील रवींद्र चांगदेव निकम यांनी एमआयडीसी पोलीस स्टेशनमध्ये फिर्याद दाखल केली असून, पोलिसांनी MH 16 DP 7941 क्रमांकाचा डंपर आणि MH 20 FK 682 क्रमांकाच्या दुचाकी चालकाविरुद्ध गुन्हा नोंदवला आहे. या घटनेची माहिती सामाजिक कार्यकर्ते सोमनाथ डोळे यांनी जिल्ह्याचे पालकमंत्री राधाकृष्ण विखे पाटील आणि पद्मश्री विखे पाटील कारखान्याचे अध्यक्ष सुजय विखे पाटील यांना दिली. नामदार विखे पाटील यांनी या घटनेची गंभीर दखल घेत संबंधित पोलीस निरीक्षकांना दोषींवर कडक कारवाई करण्याचे आदेश दिले आहेत.
आकांक्षा हिच्या घरची आर्थिक परिस्थिती अत्यंत हलाखीची असून तिचे वडील मोलमजुरी करून कुटुंबाचा उदरनिर्वाह करतात. हॉस्पिटलचे आतापर्यंतचे बिल दीड लाख रुपयांच्या घरात गेले असून, पुढील शस्त्रक्रियेसाठी आणखी दोन ते तीन लाख रुपयांची तातडीने गरज आहे. पैशांअभावी पुढील उपचार थांबण्याची भीती निर्माण झाली आहे.
आपल्या पोटच्या लेकीचे प्राण वाचवण्यासाठी निकम कुटुंबियांची मोठी ओढाताण होत असून, समाजातील दानशूर व्यक्तींनी आणि सामाजिक संस्थांनी या कठीण काळात तिच्या आईच्या 9673774311 या फोन पे क्रमांकावर आर्थिक मदत करावी, असे कळकळीचे आवाहन आकांक्षाच्या पालकांनी केले आहे.
