पोलिसांची मोठी कारवाई; बनावट नोटांचा कारखाना उद्ध्वस्त, ग्राफिक डिझायनर असलेला मुख्य सूत्रधार जेरबंद

कारवाईमुळे बनावट नोटांचे मोठे रॅकेट उघड झाले असून पोलीस आता या प्रकरणाच्या अधिक मुळाशी जात आहेत.
मालेगाव:
येथील छावणी पोलीस ठाण्यात दाखल असलेल्या बनावट नोटांच्या प्रकरणाचा छडा लावण्यात मालेगाव परिमंडळ पोलिसांना मोठे यश आले आहे. पोलिसांनी थेट छत्रपती संभाजीनगर येथील बनावट नोटा तयार करणाऱ्या कारखान्यावर छापा टाकून या संपूर्ण रॅकेटचा मुख्य सूत्रधार संतोष उत्तमराव केळसकर याला बेड्या ठोकल्या आहेत.
या कारवाईत पोलिसांनी पाचशे रुपयांच्या २०० बनावट नोटांसह नोटा छापण्यासाठी लागणारे साहित्य असा एकूण २ लाख ३६ हजार ७०० रुपयांचा मुद्देमाल जप्त केला आहे.
या प्रकरणाची सुरुवात २३ जानेवारी २०२६ रोजी झाली, जेव्हा सटाणा नाका येथील एचडीएफसी बँकेत एका फायनान्स कंपनीचे कलेक्शन एजंट गणेश खरे हे रक्कम भरण्यासाठी आले होते. त्यांच्या ८९ हजार रुपयांच्या भरण्यामध्ये ५० हजार रुपयांच्या (पाचशेच्या १०० नोटा) बनावट असल्याचे बँकेच्या निदर्शनास आले. बँकेचे असिस्टंट मॅनेजर मोहन मुसळे यांच्या तक्रारीवरून छावणी पोलिसांनी तात्काळ गुन्हा दाखल केला आणि तपासाची चक्रे फिरवली.
पोलिस तपासादरम्यान हे जाळे अत्यंत खोलवर पसरल्याचे दिसून आले. सुरवातीला अजय राठोड याला ताब्यात घेण्यात आले, त्याने ट्रॅक्टरचा हप्ता भरण्यासाठी या नोटा दिल्या होत्या. त्यानंतर सखोल चौकशीतून करण राठोड, बन्सीलाल यादव, समीर शेख आणि गोल्डन कुरेशी अशी एकामागून एक नावे समोर येत गेली. या साखळीचा पाठलाग करत असताना पोलिसांना अजिंक्य जाधव आणि शुभम थोरात यांच्यामार्फत मुख्य सूत्रधार संतोष केळसकर याच्यापर्यंत पोहोचण्यात यश आले.
केळसकर हा व्यवसायाने ग्राफिक डिझायनर असून तोच या बनावट नोटांच्या निर्मितीचे काम पाहत होता. त्याच्याकडून एक लाख रुपयांच्या बनावट नोटा आणि त्या तयार करण्यासाठी लागणारे १ लाख ३६ हजार रुपयांचे साहित्य हस्तगत करण्यात आले आहे. या कारवाईमुळे बनावट नोटांचे मोठे रॅकेट उघड झाले असून पोलीस आता या प्रकरणाच्या अधिक मुळाशी जात आहेत.