शेअर मार्केटमध्ये गुंतवणुकीच्या नावाखाली संगमनेर परिसरात ६.६५ कोटींचा गंडा; चौघांविरुद्ध गुन्हा दाखल

संगमनेर, प्रतिनिधी-
शेअर मार्केटमध्ये गुंतवणूक केल्यास दरमहा १० ते ११ टक्क्यांपर्यंत भरघोस परतावा देण्याचे आमिष दाखवून संगमनेर तालुक्यातील सुमारे ६० ते ६२ नागरिकांची ६ कोटी ६५ लाख ३९ हजार ८३७ रुपयांची आर्थिक फसवणूक केल्याचा धक्कादायक प्रकार उघडकीस आला आहे. या प्रकरणी संगमनेर शहर पोलीस ठाण्यात चौघांविरुद्ध गुन्हा दाखल करण्यात आला असून परिसरात खळबळ उडाली आहे.
या प्रकरणातील फिर्यादी योगेश रामदास जऱ्हाड (रा. आश्वी बु।।, ता. संगमनेर) यांना त्यांचे मित्र राहुल शिंदे आणि ओळखीचे विजय काळे यांनी डिसेंबर २०२४ मध्ये शेअर मार्केटमध्ये गुंतवणुकीसाठी प्रवृत्त केले होते. ‘अदमास डेप्ट कन्सल्टन्सी प्रा.लि.’ आणि ‘प्रथम वेल्थ मॅनेजमेंट’ या कंपन्यांच्या माध्यमातून चांगला परतावा मिळेल, असे आमिष त्यांना दाखवण्यात आले. आरोपींनी फिर्यादीचा विश्वास संपादन करून त्यांना गुंतवणूक करण्यास भाग पाडले.
फिर्यादी जऱ्हाड यांनी वेळोवेळी आरटीजीएस आणि फोन-पे द्वारे एकूण १०,००,००० रुपये संशयित आरोपींच्या खात्यावर वर्ग केले होते. सुरुवातीचे दोन महिने त्यांना ११ टक्के दराने परतावा देण्यात आला, मात्र त्यानंतर परतावा देण्यास टाळाटाळ सुरू झाली. फिर्यादीने जेव्हा संगमनेरमधील घुलेवाडी येथील जिजामाता प्राईड इमारतीमधील कार्यालयात भेट दिली, तेव्हा ते कार्यालय बंद असल्याचे आढळून आले.
केवळ फिर्यादीच नव्हे तर संगमनेर तालुक्यातील इतर ६० ते ६२ नागरिकांनाही अशाच प्रकारे जादा परताव्याचे आमिष दाखवून गुंतवणुकीस प्रवृत्त करण्यात आले होते. या सर्वांची मिळून एकूण ६ कोटी ६५ लाख ३९ हजार ८३७ रुपयांची फसवणूक झाली असल्याचे फिर्यादीत नमूद करण्यात आले आहे.
पोलिसांनी या प्रकरणी संशयित आरोपी महेश विश्वास मोरे (रा. माळेगाव पठार, ता. संगमनेर), वैभव विठ्ठल काकड (रा. डोळासणे, ता. संगमनेर), राहुल शिंदे (रा. आश्वी बुद्रुक, ता. संगमनेर), विजय तबाजी काळे (रा. मालदाड रोड, संगमनेर) यांच्याविरुद्ध भारतीय न्याय संहिता (BNS), २०२३ च्या कलम ३१८ (४), ३१६ (२) आणि ३ (५) अन्वये दाखल करण्यात आला आहे. पुढील तपास पोलीस निरीक्षक सचिन वाकडे करत आहेत.