संगमनेरमध्ये शनिवारी महिलांसाठी मोफत कॅन्सर तपासणी शिबिर; एकविरा फाउंडेशन व एसएमबीटीचा पुढाकार

संगमनेर, प्रतिनिधी –
सध्या समाजामध्ये वाढत चाललेले कॅन्सरचे प्रमाण ही एक गंभीर चिंतेची बाब बनली आहे. मात्र, प्राथमिक टप्प्यात निदान होऊन योग्य उपचार घेतल्यास हा आजार पूर्णपणे बरा होऊ शकतो. याच सामाजिक बांधिलकीतून शनिवारी (दिनांक १४ मार्च) एकविरा फाउंडेशन, इंडियन कॅन्सर सोसायटी आणि एसएमबीटी सेवाभावी ट्रस्ट यांच्या संयुक्त विद्यमाने महिला व युवतींसाठी विशेष मोफत कॅन्सर तपासणी शिबिराचे आयोजन करण्यात आले आहे.
एकविरा फाउंडेशनच्या अध्यक्षा तथा कॅन्सरतज्ञ डॉ. जयश्रीताई थोरात यांनी ही माहिती दिली असून जास्तीत जास्त महिलांनी या सुवर्णसंधीचा लाभ घेण्याचे आवाहन त्यांनी केले आहे.
राज्याचे ज्येष्ठ नेते बाळासाहेब थोरात यांच्या मार्गदर्शनाखाली सध्या जागतिक महिला दिनाचे औचित्य साधून एकविरा फाउंडेशनच्या वतीने विविध क्रीडा स्पर्धांचे आयोजन करण्यात आले आहे. यामध्ये क्रिकेट, रस्सीखेच आणि बॅडमिंटन अशा खेळांमध्ये सुमारे ५२०० महिलांनी उत्स्फूर्त सहभाग नोंदवला आहे. महिलांच्या या वाढत्या प्रतिसादामुळे स्पर्धांचा कालावधी दोन दिवसांनी वाढवण्यात आला असून, खेळांसोबतच त्यांच्या आरोग्याला प्राधान्य देण्यासाठी या शिबिराचे नियोजन करण्यात आले आहे.
हे भव्य शिबिर शनिवारी सकाळी १० ते दुपारी २ या वेळेत स्थानिक क्रीडा संकुलात ‘सतर्क अभियाना’ अंतर्गत पार पडणार आहे. यामध्ये प्रामुख्याने ब्रेस्ट कॅन्सर, गर्भाशय मुखाचा कॅन्सर आणि रक्ताचा कॅन्सर यांसह विविध प्रकारच्या कॅन्सरची तज्ज्ञांमार्फत मोफत तपासणी केली जाईल. या शिबिराचे विशेष आकर्षण म्हणजे, खासगी रुग्णालयांमध्ये ज्या तपासण्यांसाठी १० हजार रुपयांहून अधिक खर्च येतो, त्या सर्व तपासण्या येथे पूर्णपणे मोफत केल्या जाणार आहेत. तसेच, तपासणीदरम्यान एखादी महिला कॅन्सर पॉझिटिव्ह आढळल्यास, अल्केम फाउंडेशनच्या सहकार्याने तिची पुढील २५ हजार रुपयांपर्यंतची आरोग्य तपासणी देखील मोफत केली जाणार आहे.
या शिबिरात एसएमबीटी सेवाभावी हॉस्पिटल, धामणगाव येथील कॅन्सर विभागातील नामांकित डॉक्टर, स्त्रीरोगतज्ज्ञ, दंतरोगतज्ज्ञ आणि अनुभवी वैद्यकीय कर्मचारी उपस्थित राहून रुग्णांची तपासणी व मार्गदर्शन करणार आहेत. तालुका व शहरातील ३० वर्षांवरील सर्व महिलांनी आणि गरजूंनी या शिबिराचा लाभ घ्यावा, असे आवाहन एकविरा फाउंडेशन, एसएमबीटी सेवाभावी ट्रस्ट आणि इंडियन कॅन्सर सोसायटीच्या वतीने करण्यात आले आहे.