संगमनेरमध्ये शेततळ्यात पडून शेतकऱ्याचा दुर्दैवी मृत्यू

संगमनेर, प्रतिनिधी- 
संगमनेर तालुक्यातील साकूर शिवारात एका पन्नास वर्षीय शेतकऱ्याचा शेततळ्यात पडून मृत्यू झाल्याची हृदयद्रावक घटना रविवारी सकाळी घडली आहे. पाराजी धोंडीबा देवगिरे असे या मृत शेतकऱ्याचे नाव असून, या घटनेमुळे संपूर्ण साकूर आणि देवगिरे वस्ती परिसरात मोठी हळहळ व्यक्त होत आहे.
मिळालेल्या माहितीनुसार, पाराजी देवगिरे हे साकूर येथील देवगिरे वस्तीवर वास्तव्यास होते. त्यांची बोराटे वस्ती परिसरात शेती असून तिथे त्यांनी शेतीच्या पाण्यासाठी अलीकडेच नवीन शेततळे उभारले होते. रविवारी (१५ मार्च) सकाळी साडेनऊ वाजेच्या सुमारास ते शेतीच्या कामासाठी या शेततळ्यावर गेले होते.
मात्र, बराच वेळ उलटूनही ते घरी न परतल्याने कुटुंबीयांनी त्यांची शोधाशोध सुरू केली. शेवटी शेततळ्याकडे जाऊन पाहिले असता त्यांचा मृतदेह पाण्यात तरंगताना दिसून आला. त्यांना तातडीने साकूर येथील खासगी रुग्णालयात उपचारासाठी नेण्यात आले, परंतु डॉक्टरांनी त्यांना मृत घोषित केले.
या घटनेची माहिती मिळताच घारगाव पोलीस ठाण्याचे पोलीस उपनिरीक्षक गांधले यांनी पथकासह घटनास्थळी धाव घेऊन पंचनामा केला. मृतदेह शवविच्छेदनासाठी संगमनेर येथील कुटीर रुग्णालयात पाठवण्यात आला आहे. पाराजी देवगिरे हे संजय देवगिरे यांचे बंधू होत. त्यांच्या पश्चात पत्नी, एक मुलगा आणि दोन मुली असा मोठा परिवार आहे. घराचा आधारवड गेल्याने देवगिरे कुटुंबावर दुःखाचा डोंगर कोसळला असून साकूर परिसरात शोककळा पसरली आहे.