शिर्डीत तरुणीचा हॉटेलमध्ये संशयास्पद मृत्यू; घातपाताचा संशय

शिर्डी, विशेष प्रतिनिधी-
तीर्थक्षेत्र शिर्डी येथे दर्शनासाठी आलेल्या एका २४ वर्षीय तरुणीचा हॉटेलमध्ये संशयास्पद मृत्यू झाल्याची धक्कादायक घटना उघडकीस आली आहे. आस्था सिंग (रा. सतना, मध्य प्रदेश) असे मृत तरुणीचे नाव असून, या घटनेमुळे परिसरात मोठी खळबळ उडाली आहे.
निमगाव शिवार येथील ‘हॉटेल साईबाबा इंटरनॅशनल सुप्रीम’मध्ये ही घटना घडली असून पोलिसांनी या प्रकरणाचा तपास अत्यंत वेगाने सुरू केला आहे. पाडव्याच्या दिवशी समोर आलेल्या या घटनेमुळे पोलीस यंत्रणे समोर तपासाचे आव्हान उभे राहिले आहे.
मिळालेल्या माहितीनुसार, आस्था सिंग आणि तिच्यासोबत आलेल्या व्यक्तींनी बुधवारी या हॉटेलमध्ये दोन खोल्या बुक केल्या होत्या. मात्र, त्याच रात्री उशिरा आस्था राहत असलेल्या खोलीतून जोरात ओरडण्याचे आणि भांडणाचे आवाज येत असल्याचे हॉटेल कर्मचाऱ्यांनी ऐकले होते.
त्यानंतर गुरुवारी सकाळी आस्थाचा मृतदेह खोलीत संशयास्पद स्थितीत आढळल्याने कर्मचाऱ्यांनी तात्काळ शिर्डी पोलिसांना याची माहिती दिली. पोलिसांनी घटनास्थळी धाव घेत पंचनामा केला असून मृतदेह उत्तरीय तपासणीसाठी पाठवला आहे.
या प्रकरणी पोलिसांनी प्राथमिक माहितीच्या आधारे एका संशयित व्यक्तीला ताब्यात घेतले आहे. ही व्यक्ती आस्थासोबतच हॉटेलमध्ये आली होती का, याचा तपास पोलीस करत आहेत. त्याचबरोबर हॉटेलमधील सीसीटीव्ही फुटेजची कसून छाननी सुरू असून, रात्री त्या खोलीत कोण-कोण आले होते, याचा शोध घेतला जात आहे.
मृत्येचे नेमके कारण अद्याप स्पष्ट झाले नसले तरी, रात्री झालेल्या भांडणाच्या पार्श्वभूमीवर पोलिसांनी घातपाताची शक्यता नाकारलेली नाही. शवविच्छेदन अहवालानंतरच हा प्रकार आत्महत्या आहे की घातपात, हे स्पष्ट होणार आहे.