महाराष्ट्र संवाद न्यूज ऑनलाईन | संगमनेर
संगमनेर शहरातील प्रभागांकरीता पालकमंत्री राधाकृष्ण विखे पाटील यांच्या सहकार्याने जिल्हा नियोजन व विकास समितीमधून सुमारे दोन कोटी रुपयांच्या निधीतून ४७ सौर ऊर्जेवरील हायमॅक्स दिवे मंजूर करण्यात आले आहेत. यापैकी १४ हायमॅक्स दिव्यांचे काम पूर्ण झाले असून, या दिव्यांचे लोकार्पण आमदार अमोल खताळ आणि महायुतीच्या पदाधिकाऱ्यांच्या उपस्थितीत करण्यात आले.
या मोहिमेअंतर्गत जनतानगरमधील जिजामाता गार्डन आणि लालतारा हाउसिंग सोसायटी येथील हायमॅक्स दिव्यांचे प्रातिनिधिक स्वरूपात लोकार्पण करण्यात आले. लोकार्पण सोहळ्यास मुख्याधिकारी दयानंद गोरे, नगरसेविका साक्षी सूर्यवंशी, शिवसेना शहराध्यक्ष विनोद सूर्यवंशी, भाजप शहराध्यक्ष पायल ताजणे, आरपीआय शहराध्यक्ष कैलास कासार यांच्यासह महायुतीचे पदाधिकारी व कार्यकर्ते उपस्थित होते.
संगमनेर विधानसभा मतदारसंघासाठी पालकमंत्री राधाकृष्ण विखे पाटील, भाजपचे प्रदेश उपाध्यक्ष डॉ. सुजय विखे पाटील आणि आमदार अमोल खताळ यांच्या प्रयत्नातून जिल्हा नियोजन समितीमार्फत एकूण २०० सौर ऊर्जेवर चालणाऱ्या स्वयंचलित हायमॅक्स दिव्यांना मंजुरी मिळाली आहे. यातील १०० दिव्यांचे काम पूर्ण झाले असून उर्वरित कामे सध्या प्रगतीपथावर आहेत. हे दिवे पूर्णपणे सौर ऊर्जेवर आधारित असल्याने स्थानिक स्वराज्य संस्थेवर वीज बिलाचा कोणताही अतिरिक्त भार पडणार नाही.
हे दिवे दररोज संध्याकाळी सात वाजता आपोआप सुरू होतात, त्यामुळे महावितरणचा वीज पुरवठा खंडित झाला तरी नागरिकांना अखंड प्रकाश सुविधा मिळणार असल्याने सुरक्षेच्या दृष्टीने हा मोठा दिलासा ठरत आहे.
लोकार्पण सोहळ्याच्या प्रसंगी बोलताना आमदार अमोल खताळ यांनी सांगितले की, शहराच्या सर्वांगीण विकासासाठी महायुती सरकारकडून निधीची कमतरता भासू दिली जाणार नाही. नागरिकांच्या मूलभूत सुविधांना आमचा सर्वोच्च प्राधान्यक्रम असून, शहरातील रस्त्यांच्या दुरुस्तीसाठी उपमुख्यमंत्री व नगरविकासमंत्री यांच्या माध्यमातून ५० लाख रुपयांचा रस्त्याच्या कामासाठी निधी मंजूर झाला आहे. तसेच नमो गार्डनची कामेही मंजूर झाली असून, शहराच्या विकासासाठी महायुती सरकार भक्कमपणे उभे आहे.
