रोटरी क्लबच्या जयपूर फूट वितरण उपक्रमातून दिव्यांगांना स्वावलंबनाची नवी दिशा; संगमनेरमध्ये ११४ दिव्यांगांना कृत्रिम अवयवांचे वाटप

महाराष्ट्र संवाद न्यूज ऑनलाईन, संगमनेर:

दर्शन रोटरी आय केअर हॉस्पिटलमध्ये शनिवारी (दि. ३० मे) पार पडलेल्या या शिबिरात ११४ दिव्यांग लाभार्थ्यांना एकूण ११८ कृत्रिम अवयवांचे विनामूल्य वितरण करण्यात आले. यामध्ये प्रामुख्याने जयपूर फूट, कृत्रिम हात आणि अत्याधुनिक ‘LN-4’ प्रोस्थेटिक हातांचा समावेश होता. या आधुनिक कृत्रिम अवयवांमुळे दिव्यांगांना दैनंदिन कामे करणे अधिक सुलभ होणार असून, त्यांच्या स्वावलंबनाच्या प्रवासाला एक नवी बळकटी मिळाली आहे.

रोटरी क्लब ऑफ संगमनेर, मुंबईचे रत्ननिधी फाऊंडेशन आणि रियांश मल्टिट्रेड लिमिटेड यांच्या संयुक्त विद्यमाने दिव्यांग बांधवांसाठी या सेवाभावी उपक्रमाचे आयोजन करण्यात आले होते. याला लाभार्थी आणि संगमनेरकर नागरिकांचा प्रतिसाद लाभला. यावेळी नगरसेविका रचना मालपाणी, रोटरी डिस्ट्रिक्ट ३१३२ चे सहाय्यक प्रांतपाल रो. अमोल वैद्य, काजळे ज्वेलर्सचे संचालक राजेंद्र काजळे, रत्ननिधी फाऊंडेशनचे मनोज चव्हाण आणि दर्शन रोटरी आय केअरच्या डॉ. तोडकडी मॅडम यांची प्रमुख उपस्थिती होती. उपस्थित मान्यवरांच्या हस्ते गरजू लाभार्थ्यांना या साहित्याचे वाटप करण्यात आले.

यावेळी बोलताना रचना मालपाणी यांनी रोटरी क्लब आणि रत्ननिधी फाऊंडेशनच्या या कौतुकास्पद कार्याचा गौरव केला. आरोग्य आणि सामाजिक क्षेत्रात भविष्यातही अशाच लोकहितवादी प्रकल्पांची अंमलबजावणी करून समाजातील वंचित व गरजू घटकांपर्यंत मदत पोहोचवावी, अशी अपेक्षा त्यांनी व्यक्त केली. तसेच उद्योजक राजेंद्र काजळे यांनीही या समाजोपयोगी प्रकल्पाला शुभेच्छा दिल्या.

उपक्रम यशस्वी करण्यासाठी रोटरी क्लब ऑफ संगमनेरचे अध्यक्ष रो. विश्वनाथ मालानी, सचिव रो. सौरभ म्हाळस, उपाध्यक्ष रो. महेश वाकचौरे, प्रकल्प समन्वयक रो. अजित काकडे आणि प्रकल्प प्रमुख रो. आनंद हासे यांनी विशेष परिश्रम घेतले. याप्रकरणी रो. महेश ढोले, रो. डॉ. प्रमोद राजुस्कर, रो. डॉ. सुजय कानवडे, रो. डॉ. किशोर पोखरकर, रो. राजेंद्र खोसे, रो. दिपक मणियार यांच्यासह अनेक रोटेरियन सदस्यांनी मोलाचे योगदान दिले.

दर्शन रोटरी आय केअर हॉस्पिटलचे व्यवस्थापक अंकुश आहेर, वैद्यकीय अधिकारी, कर्मचारी आणि रत्ननिधी फाऊंडेशनच्या संपूर्ण टीमने या शिबिराचे नेटके नियोजन केले.