‘लग्न आणि धर्म परिवर्तना’साठी दबाव; पीडित महिला अधिकाऱ्याचा राजीनामा, ‘कॉर्पोरेट जिहाद’चा आरोप

महाराष्ट्र संवाद न्यूज ऑनलाईन | पुणे:

पुण्यातील प्रमुख आयटी हब मानल्या जाणाऱ्या हिंजवडी परिसरातून एक अत्यंत धक्कादायक आणि खळबळजनक प्रकार समोर आला आहे. येथील एका नामांकित आयटी कंपनीत उच्च पदावर कार्यरत असलेल्या एका ४८ वर्षीय महिला कर्मचाऱ्यावर लग्न करण्यासाठी आणि धर्म परिवर्तन करण्यासाठी प्रचंड दबाव आणल्याचा गंभीर आरोप करण्यात आला आहे.

या प्रकरणी पीडित महिला अधिकाऱ्याने पुण्यात आयोजित एका पत्रकार परिषदेत जाहीरपणे वाच्यता करत स्वतःवर झालेल्या अन्यायाला वाचा फोडली आहे. पीडित महिलेने दिलेल्या माहितीनुसार, ती हिंजवडीतील एका नामांकित आयटी कंपनीत मोठ्या पदावर कार्यरत होती. याच कार्यालयात काम करणाऱ्या एका अन्य महिला कर्मचाऱ्याने तिच्यावर लग्न करण्यासाठी आणि धर्म बदलण्यासाठी वारंवार दबाव आणण्यास सुरुवात केली होती. मात्र, पीडित महिलेने या दबावाला बळी न पडता या सर्व मागण्यांना अत्यंत स्पष्ट शब्दांत नकार दिला. एवढेच नव्हे तर कंपनीतील एका अंतर्गत कार्यक्रमात तिने या गंभीर विषयावर जाहीरपणे भाष्यही केले होते.

हा नकार संबंधित व्यक्तींच्या जिव्हारी लागल्यामुळे त्यांनी पीडित महिलेविरुद्ध सूडबुद्धीने वागण्यास सुरुवात केली. लग्न आणि धर्मपरिवर्तनाचा प्रस्ताव नाकारल्याचा सूड म्हणून कामाच्या ठिकाणी तिला जाणीवपूर्वक त्रास देणे सुरू झाले. कार्यालयातील वातावरण अत्यंत क्लेशदायक बनवून तिच्यावर सातत्याने मानसिक दबाव निर्माण करण्यात आला. या छळाला कंटाळून अखेर त्या महिला अधिकाऱ्याला आपल्या पदाचा राजीनामा द्यावा लागला, असा दावा पीडित महिलेने केला आहे.

या संपूर्ण प्रकरणाची आता ‘हिंदू जनजागृती समिती’ने गंभीर दखल घेतली आहे. समितीने या प्रकरणाला ‘कॉर्पोरेट जिहाद’ असे संबोधत या संपूर्ण प्रकाराची सखोल आणि उच्चस्तरीय चौकशी करण्यात यावी, अशी आग्रही मागणी प्रशासनाकडे केली आहे. सुशिक्षित आणि अत्यंत सुरक्षित मानल्या जाणाऱ्या आयटी क्षेत्रात अशा प्रकारचा अमानुष मानसिक छळ होत असल्याने सध्या पुणे शहर आणि आयटी वर्तुळात तीव्र संताप व्यक्त केला जात आहे.