संगमनेर येथील जिल्हा व सत्र न्यायालयाचा निकाल: पोक्सो प्रकरणातील आरोपीची निर्दोष मुक्तता

महाराष्ट्र संवाद न्यूज ऑनलाईन | संगमनेर:

संगमनेर न्यायालयाने एका पोक्सो कायद्या अंतर्गत दाखल असलेल्या गुन्ह्यात आरोपीची सर्व आरोपातून निर्दोष मुक्तता केली आहे. नाजिम असगरअली अन्सारी असे न्यायालयाने निर्दोष मुक्त केलेल्या आरोपीचे नाव आहे.

संगमनेर शहर पोलीस ठाण्यात दाखल असलेल्या गुन्हा रजिस्टर क्रमांक ७१/२०२० अंतर्गत या प्रकरणाची सुनावणी येथील ३ रे जिल्हा व सत्र न्यायाधीश व्ही. बी. गव्हाणे यांच्या न्यायालयासमोर सुरू होती. या खटल्यादरम्यान सरकार पक्षाच्या वतीने एकूण ९ साक्षीदार तपासण्यात आले, तसेच विविध कागदपत्रे आणि पुरावे न्यायालयासमोर सादर करण्यात आले होते.

विशेष म्हणजे, या प्रकरणातील एकही साक्षीदार फितूर झाला नव्हता. मात्र, सुनावणी दरम्यान बचाव पक्षाने साक्षीदारांच्या जबाबांमधील परस्पर विसंगती, पोलीस तपासातील गंभीर त्रुटी आणि उपलब्ध पुराव्यांमधील उणिवा न्यायालयाच्या निदर्शनास आणून दिल्या.

दोन्ही बाजूंचा युक्तिवाद आणि अभिलेखावरील पुराव्यांचे सखोल परीक्षण केल्यानंतर, न्यायालयाने महत्त्वपूर्ण निरीक्षण नोंदवले. आरोपीवरील आरोप सिद्ध करण्यात सरकार पक्षाला अपयश आल्याचे स्पष्ट करत न्यायालयाने आरोपीला संशयाचा फायदा देऊन त्याची निर्दोष मुक्तता करण्याचे आदेश आज शनिवारी न्यायाधीश व्ही. बी. गव्हाणे यांनी दिले.

या खटल्यात आरोपीच्या वतीने ॲड. सुशांत कवडे यांनी प्रभावीपणे कायदेशीर बाजू मांडली, त्यांना ॲड. संकेत साबळे यांनी सहकार्य केले.