‘दत्तधाम’च्या गडगे महाराजाच्या पत्नी अन् मुलाला दिलासा; सत्र न्यायालयाकडून अटकपूर्व जामीन मंजूर

महाराष्ट्र संवाद न्यूज ऑनलाईन
संगमनेर:
दैवी शक्ती, मंतरलेले उपचार आणि असाध्य आजार बरे करण्याचा दावा करत गोरगरीब जनतेची आर्थिक, शारीरिक व मानसिक पिळवणुकीचा आरोप असलेल्या वडगावपान (ता. संगमनेर) येथील भोंदू महाराज राजेंद्र बापू गडगे याच्या कुटुंबाला सत्र न्यायालयाने दिलासा दिला आहे. या प्रकरणात राजेंद्र गडगेची पत्नी अश्विनी राजेंद्र गडगे आणि मुलगा शिवम राजेंद्र गडगे यांचा अटकपूर्व जामीन अर्ज संगमनेरचे अतिरिक्त सत्र न्यायाधीश मंदार नेरलेकर यांनी मंजूर केला आहे.
नेमके प्रकरण काय?
महाराष्ट्र अंधश्रद्धा निर्मूलन समितीच्या (अंनिस) राज्य सचिव अ‍ॅड. रंजना पगार-गवांदे यांनी संगमनेर तालुका पोलीस ठाण्यात १७ एप्रिल २०२६ रोजी दिलेल्या फिर्यादीवरून हा गुन्हा दाखल झाला होता. राजेंद्र बापू गडगे याने ‘दत्तधाम सरकार’ नावाचे यूट्यूब चॅनेल आणि सोशल मीडियाच्या माध्यमातून कॅन्सर, ब्रेन ट्युमर, वंध्यत्व यांसारखे आजार देवाच्या नावाने आणि मंत्रशक्तीने बरे करण्याचे दावे केले होते. उपचाराच्या नावाखाली अवाढव्य दराने वनस्पती व पालापाचोळ्याची औषधे विकून लोकांची कोट्यवधी रुपयांची फसवणूक केली जात होती. याशिवाय, कोणतीही वैद्यकीय पदवी अथवा औषध साठवणुकीचा परवाना नसताना हा प्रकार सुरू होता.
पोलीस व अंनिसकडे तक्रार केल्याच्या रागातून आरोपींनी अ‍ॅड. रंजना गवांदे आणि त्यांच्या सहकाऱ्यांना खंडणीच्या खोट्या प्रकरणात अडकवण्यासाठी एआय तंत्रज्ञान व बनावट व्हिडिओंचा वापर करून दत्तधाम आश्रमाच्या इन्स्टाग्राम अकाउंटवरून व्हिडिओ व्हायरल केले होते.
पोलीस तपासात धक्कादायक खुलासे
सरकारी पक्षाच्या वतीने अतिरीक्त सरकारी अभियोक्ता एस. ए. वाकचौरे यांनी न्यायालयात बाजू मांडताना तपासातील गंभीर बाबी समोर आणल्या. तपासादरम्यान राजेंद्र गडगे आणि त्याच्या कुटुंबाच्या नावे विविध बँका व पतसंस्थांमध्ये सुमारे १.५ कोटी रुपये जमा असल्याचे आणि जवळपास ५ कोटी रुपयांची १३ पेक्षा जास्त स्थावर मालमत्ता असल्याचे उघडकीस आले आहे.
पोलीस पथकाने दत्तधाम आश्रमातील ३० निवासी खोल्यांची झडती घेऊन ९९ प्रकारचा औषधी साठा जप्त करत तो आश्रम सील केला आहे. घरामधून ३,३६,६६० रुपये रोख, व्हिडिओ रेकॉर्डिंगचे संगणक, कॅमेरे व लॅपटॉप जप्त करण्यात आले असून आश्रमातील पावती पुस्तके आणि कर्मचाऱ्यांचे पगार रजिस्टर सी.ए. मार्फत तपासणीसाठी ताब्यात घेण्यात आले आहेत.
बचाव पक्षाचा युक्तिवाद अन् न्यायालयाचा निर्णय
अर्जदारांच्या वतीने विधीज्ञ उदयसिंह ढोमसे यांनी न्यायालयात युक्तिवाद करताना सांगितले की, २२ वर्षीय अर्जदार शिवम गडगे हा पुण्यातील फर्ग्युसन महाविद्यालयात तत्त्वज्ञानाचा विद्यार्थी आहे आणि अश्विनी गडगे या गृहिणी आहेत. एफआयआरमध्ये अर्जदारांच्या विशिष्ट भूमिकेचा किंवा थेट कृत्याचा कोणताही स्पष्ट उल्लेख नसून, केवळ मुख्य आरोपीचे कुटुंबीय असल्याने त्यांना खोट्या आरोपांत अडकवण्यात आले आहे.
अतिरिक्त सत्र न्यायाधीश मंदार नेरलेकर यांनी दोन्ही बाजूंचा युक्तिवाद विचारात घेत स्पष्ट केले की, प्रथम माहिती अहवालात (FIR) अर्जदारांवर कोणतेही विशिष्ट गंभीर आरोप नाहीत आणि गुन्ह्यात थेट सहभाग सकृतदर्शनी दिसून येत नाही. मागील अडीच महिन्यांत तपास अधिकाऱ्यांना त्यांच्या अटकेची गरज भासली नव्हती; परंतु फिर्यादींच्या तक्रारींमुळे अर्जदारांना अटकेची भीती वाटत असल्याने त्यांना संरक्षण देणे न्यायोचित ठरेल असा निष्कर्ष काढला.
न्यायालयाने शिवम गडगे व अश्विनी गडगे यांना प्रत्येकी ४०,००० रुपयांच्या वैयक्तिक जातमुचलक्यावर जामीन मंजूर केला. तसेच फिर्यादी व साक्षीदारांवर कोणत्याही प्रकारचा दबाव न आणणे, त्यांच्याशी संपर्क न साधणे आणि पोलीस तपासात किंवा पुराव्यांमध्ये छेडछाड अथवा हस्तक्षेप न करण्याच्या कडक अटी न्यायालयाने घातल्या आहेत. न्यायालयीन कामात ॲड. उदयसिंह जे ढोमसे पाटील यांना ॲड. विजय उगले, ॲड. पंकज कडलग, ॲड. जयसेन गायकवाड, ॲड. समीर फटांगरे यांनी सहकार्य केले.