सत्याचा आवाज, लेखणीचा पहारेकरी – ज्येष्ठ पत्रकार अनंत पांगारकर यांचा आंबेडकरी चळवळीच्यावतीने हृद्य सत्कार

Annant Ppangarkar

महाराष्ट्र संवाद न्यूज ऑनलाईन 

लेखणीला विचारांची दिशा देणारे, सत्याला सत्य आणि असत्याला असत्य म्हणण्याची हिंमत बाळगणारे, संगमनेर तालुक्याच्या पत्रकारितेचा मानदंड असलेले संवेदनशील ज्येष्ठ पत्रकार अनंत पांगारकर यांना त्यांच्या वाढदिवसानिमित्त आंबेडकरी चळवळ आणि काँग्रेस परिवाराच्यावतीने आज हृदयपूर्वक सत्कार करण्यात आला.

पांगारकर सर म्हणजे केवळ एक पत्रकार नाहीत, तर ते एक विचार आहेत. त्यांनी आपल्या प्रदीर्घ पत्रकारितेच्या काळात अनेक वेळा पुण्यनगरीसह राज्यातील नामांकित दैनिकांचे विभागीय प्रतिनिधी, उपसंपादक, ब्युरो चीफ म्हणून जबाबदारी सांभाळत, वंचित, शोषित, पीडितांच्या व्यथेला वाचा फोडली. त्यांच्या लेखणीत नेहमीच पुरोगामी महाराष्ट्राची, फुले-शाहू-आंबेडकरांच्या विचारांची झलक राहिली आहे. सत्तेला प्रश्न विचारण्याची आणि समाजाच्या शेवटच्या घटकासाठी लिहिण्याची त्यांची भूमिका आजच्या काळात दुर्मिळ आहे.

या सत्कार सोहळ्याचे औचित्य साधून मान्यवरांनी आपल्या भावना व्यक्त केल्या. “पत्रकारिता हा व्यवसाय नाही, तर ती लोकशाहीचा चौथा स्तंभ म्हणून समाजाचे ऋण फेडण्याची संधी आहे, हे पांगारकर सरांनी आपल्या कृतीतून दाखवून दिले,” असे गौरवोद्गार यावेळी काढण्यात आले.

यावेळी शुभेच्छा देण्यासाठी व सत्कारासाठी उपस्थित मान्यवर अहिल्यानगर जिल्हा काँग्रेस कमिटी, अनुसूचित जाती विभागाचे जिल्हाध्यक्ष बंटी यादव, आंबेडकरी चळवळीचे ज्येष्ठ नेते के. एस. (नाना) गायकवाड, जिल्हा काँग्रेसचे कार्याध्यक्ष अरुणकाका गावित्रे, ज्येष्ठ आंबेडकरवादी विचारवंत के. पी. बनसोडे सर, जिल्हा काँग्रेसचे उपाध्यक्ष शशिकांत थोरात, जिल्हा काँग्रेसचे सरचिटणीस रामनाथ गायकवाड, संगमनेर शहर काँग्रेसचे अध्यक्ष सोनू गायकवाड, आंबेडकरी चळवळीतील युवा नेतृत्व पॅन्थर विनोद गायकवाड, जिल्हा काँग्रेस सोशल मीडिया समन्वयक उदय अभंग, महेश हांडे आदी मान्यवर मोठ्या संख्येने उपस्थित होते.

यावेळी उपस्थितांनी अनंत पांगारकर सरांना उत्तम आरोग्य, दीर्घायुष्य आणि त्यांच्या लेखणीला अधिकाधिक बळ मिळो, अशा मनापासून शुभेच्छा दिल्या. त्यांच्या पुढील वाटचालीसाठी आंबेडकरी समाजाच्या वतीने कृतज्ञता व्यक्त करण्यात आली.