शिंदेवाडी जिल्हा परिषद शाळेत ‘एक विद्यार्थी, एक बेंच’ उपक्रमाला अभूतपूर्व प्रतिसाद; आठवडाभरात ६८ हजारांच्या लोकसहभागातून ४० बेंचचे लोकार्पण

Annant Ppangarkar

महाराष्ट्र संवाद न्यूज ऑनलाईन –

शिक्षणातील लोकसहभाग आणि आधुनिक तंत्रज्ञानाचा कल्पक वापर करत गणोरे येथील जिल्हा परिषद प्राथमिक शाळा, शिंदेवाडी येथे राबविण्यात आलेल्या ‘एका विद्यार्थ्यासाठी एक बेंच, माझे अभिमानास्पद पालकत्व’ या अभिनव उपक्रमाला माजी विद्यार्थी, ग्रामस्थ व दात्यांचा अत्यंत उत्स्फूर्त प्रतिसाद मिळाला आहे. 

अवघ्या एका आठवड्याच्या कालावधीत तब्बल ६८ हजार रुपयांचा निधी संकलित झाला असून, या माध्यमातून शाळेतील विद्यार्थ्यांसाठी ४० आकर्षक बेंच उपलब्ध करून देण्यात आले. पोषण महासप्ताह आणि पारंपरिक दहीहंडीच्या औचित्यावर आयोजित विशेष कार्यक्रमात विविध क्षेत्रांतील मान्यवरांच्या हस्ते या सर्व बेंचचे लोकार्पण करण्यात आले.

शाळेच्या मुख्याध्यापिका वृषाली सुनील कडलग यांनी विद्यार्थ्यांच्या बैठक व्यवस्थेत सुधारणा करण्यासाठी १,७०० रुपये किमतीचा एक बेंच देण्याचे आवाहन करत ‘माझे अभिमानास्पद पालकत्व’ ही संकल्पना पुढे आणली होती. या आवाहनासाठी कृत्रिम बुद्धिमत्तेचा (AI) प्रभावी वापर करून तयार केलेली एक जनजागृती प्रतिमा माजी विद्यार्थी आणि ग्रामस्थांच्या व्हॉट्सॲप ग्रुपवर प्रसारित करण्यात आली. या संकल्पनेला सामाजिक बांधिलकीतून तातडीने प्रतिसाद देत रामकृष्ण दातीर यांनी आपल्या आई संजीवनी यांच्या हस्ते २० हजार रुपयांची पहिली मोठी देणगी सुपूर्द केली.

यानंतर या उपक्रमाला गती मिळाली आणि प्रा. डॉ. अशोक मारुती दातीर, प्रभाकर भीमाशंकर आहेर, लताबाई भीमाशंकर आहेर, ज्ञानेश्वर भीमाशंकर आहेर, रावसाहेब रामभाऊ दातीर, गोरक्षनाथ म्हातारबा दातीर, प्रा. शरद तुपविहिरे, रो. सुनील किसनराव कडलग, प्राचार्य श्रीकांत माघाडे, रो. सुनील घुले तसेच रोटरी क्लब ऑफ संगमनेरचे अध्यक्ष रो. समीर शाह यांच्यासह अनेक दानशूर व्यक्तींनी मोलाचे योगदान दिले. या एकत्रित प्रयत्नांमुळे ‘माझी शाळा, माझी जबाबदारी’ ही भावना अधिक दृढ झाली असून, नवीन सुंदर बेंच शाळेत दाखल होताच विद्यार्थ्यांच्या चेहऱ्यावर आनंदाचे वातावरण पसरले.

लोकार्पण सोहळ्यादरम्यान इतर सामाजिक उपक्रमही मोठ्या उत्साहात पार पडले. महाराष्ट्र जिजाऊ ब्रिगेड, संगमनेरच्या डॉ. दिपाली पानसरे, डॉ. नीलम शिंदे व स्नेहलता कडलग यांच्या वतीने शाळेसाठी एक टेबल व सहा खुर्च्या भेट देण्यात आल्या. याच वेळी ‘एक पेड माँ के नाम’ या पर्यावरणाभिमुख उपक्रमांतर्गत उपस्थित महिलांना ५१ केशर आंब्याची रोपे वाटण्यात आली. क्रांतीज्योती सावित्रीबाई फुले-कुसुमाग्रज वाचनालयाच्या समृद्धीसाठी डॉ. नीलम शिंदे यांनी मनोरंजक गोष्टींची पुस्तके भेट दिली, तर लक्ष्मीबेन नानजीभाई ठक्कर, ठाणावाला यांच्या सौजन्याने विद्यार्थ्यांना वह्या, सतरंजी व पेन तसेच अंगणवाडीतील छोट्या बालकांना कपड्यांचे वाटप करण्यात आले. याच कार्यक्रमात विविध स्पर्धा परीक्षांमध्ये राज्य व जिल्हास्तरावर उल्लेखनीय यश संपादन केल्याबद्दल श्रावणी दिगंबर दातीर हिचा मान्यवरांच्या हस्ते विशेष सन्मान करण्यात आला.

सदर कार्यक्रमाचे अध्यक्षस्थान खिरवीरे बीटचे विस्तार अधिकारी ज्ञानेश्वर माळवे यांनी भूषविले. याप्रसंगी देवठाण बीटचे विस्तार अधिकारी अनिल गायकवाड, केंद्रप्रमुख उत्तम गायकवाड, डॉ. नीलम शिंदे, डॉ. दिपाली पानसरे, स्नेहलता कडलग, शाळा व्यवस्थापन समितीचे अध्यक्ष दिगंबर दातीर, उपाध्यक्ष प्रियंका हांडे यांच्यासह इतर सर्व सदस्य, पालक व नागरिक मोठ्या संख्येने उपस्थित होते. कार्यक्रमाच्या सुरुवातीला मुख्याध्यापिका वृषाली कडलग यांनी प्रास्ताविक करताना शाळेतील विविध शैक्षणिक उपक्रम, CSR च्या माध्यमातून झालेली भौतिक प्रगती आणि लोकसहभागाचा सविस्तर आढावा मांडला. कार्यक्रमाची सांगता लहान मुलांच्या हस्ते उत्साहात दहीहंडी फोडून करण्यात आली, तर उपस्थितांचे आभार सहशिक्षिका कल्पना पाटील यांनी मानले. शिक्षण, पोषण, पर्यावरण संवर्धन आणि तंत्रज्ञानाचा संगम घडवणारा हा उपक्रम इतर शाळांसाठी प्रेरणादायी ठरत आहे.