महाराष्ट्र संवाद न्यूज नेटवर्क
अहमदनगरच्या पालकमंत्र्यांनी वाळू तस्करीसाठी वापरल्या जाणाऱ्या दोन लोखंडी बोटी स्वतः पकडण्याच्या घटनेला काही तास उलटत नाही तोच, नाशिकच्या पालकमंत्र्यांचे नवे धाडस समोर आले आहे. पालकमंत्री दादा भुसे यांनी दरोड्याच्या उद्देशाने हातात पिस्तूल घेऊन बंगल्यात घुसलेल्या चोरट्याला पकडण्याचे धाडस दाखवले आहे. यामुळे बंगल्यातील तीन महिलांचे प्राण वाचले.
मालेगावच्या कलेक्टर पट्टा भागात घडलेल्या या घटनेची चर्चा राज्यभरात होत आहे. पालकमंत्री भुसे यांनी पकडलेल्या या संशयित चोराला पोलिसांच्या ताब्यात देण्यात आले असल्याची माहिती मिळाली.
आज लक्ष्मीपूजन असल्याने बंगल्यात मोठ्या प्रमाणात रोकड, दाग दागिने असेल ते लुटून नेता येतील या उद्देशाने दुपारी साधारणता तीन वाजण्याच्या सुमारास एक चोरटा बंगल्यात घुसला. यावेळी बंगल्यामध्ये तीन महिला होत्या. 
चोरट्याने त्याच्याकडील पिस्तुलाचा महिलांना धाक दाखवत दागिने आणि पैशाची मागणी केली. अचानक घडलेल्या या प्रकारामुळे घाबरून गेलेल्या महिलांनी आरडाओरडा करायला सुरुवात केली.
या महिलांचा आवाज ऐकून काही नागरिक बंगल्याबाहेर गोळा झाले. नेमके याचवेळी पालकमंत्री दादा भुसे देखील याच भागात होते. त्यांनी देखील लगेच या बंगल्याकडे धाव घेत बंगल्याच्या आत असलेल्या चोरट्याला शरण येण्याचे आवाहन केले. तब्बल दोन तास हा प्रकार सुरू होता. अखेरीस शरण आलेल्या छोट्याला नागरिकांनी चांगला चोप देत त्याला पोलिसांच्या स्वाधीन केले.
अहमदनगरचे पालकमंत्री व राज्याचे महसूल मंत्री राधाकृष्ण विखे पाटील अतिवृष्टी पाहणी दौऱ्यावर असताना त्यांनी रविवारी नेवासे येथे वाळू उपसा करण्यासाठी वापरल्या जाणाऱ्या दोन लोखंडी बोटी पकडत संबंधितांवर कारवाई करण्याचे आदेश दिले होते.
या प्रकाराची चर्चा सुरू असताना सोमवारी नाशिकच्या पालकमंत्र्यांनी दाखवलेल्या धाडसाची चर्चा सुरू झाली आहे.
