महाराष्ट्र संवाद न्यूज नेटवर्क
राज्यभरात बिजनेस कोच म्हणून प्रसिद्ध असलेले विनीत बनसोडे आता संगमनेर मधील उद्योजकांना शनिवारी (५ नोव्हेंबर) उद्योग वृद्धीसाठी मार्गदर्शन करणार आहेत, अशी माहिती सॅटर्डे क्लब ग्लोबल ट्रस्टच्या संगमनेर शाखेचा सेक्रेटरी डॉ. सागर गोपाळे यांनी दिली.
नासिक-पुणे महामार्गावरील हिवरगाव पावसा येथील हॉटेल मयूर एक्सप्रेसमध्ये शनिवारी सायंकाळी या कार्यक्रमाचे आयोजन करण्यात आले आहे. विनीत बनसोडे हे बिजनेस कोच म्हणून संपूर्ण महाराष्ट्रात सुपरिचित आहेत. सॅटर्डे क्लब ग्लोबल ट्रस्टच्या सेक्रेटरी जनरल या पदावर ते कार्यरत आहेत. 
प्रसिद्ध बिझनेस कोच संतोष नायर यांचे ते गुरु आहेत. सॅटर्डे क्लब ग्लोबल ट्रस्ट ही उद्योजकांसाठीची संघटना वीस वर्षांहून अधिक काळ व्यावसायिकांसाठी कार्यरत आहे. महाराष्ट्रात ७५ शहरांत या क्लबच्या शाखा आहेत. संगमनेर क्लबमध्ये त्याचे शंभरहून अधिक क्रियाशील व्यावसायिक सदस्य आहेत.
कोच विनीत बनसोडे हे कॉर्पोरेट ट्रेनर व टेड एक्स स्पीकर सुद्धा आहेत. तीन वर्षांपूर्वी संगमनेरमध्ये झालेल्या सेमिनार नंतर बऱ्याच उद्योजकांना आपल्या व्यवसायातील अडचणी दूर करण्यास मदत झाली होती. व्यवसाय कसा करावा? व्यवसायातल्या अडचणी दूर कशा कराव्यात? व्यवसाय करताना कोणाला सोबत घ्यावे तसेच कोणापासून दूर राहावे. भांडवल वृद्धी कशी करावी यासारख्या अनेक महत्त्वाच्या गोष्टी सोप्या उदाहरणांद्वारे समजून सांगणे ही विनीत बनसोडे यांची खासियत आहे.
या कार्यक्रमासाठी नाशिक, सिन्नर, अकोले व नारायणगाव या ठिकाणाहून उद्योजक सहभागी होणार आहेत. संगमनेरमधील जे उद्योजक क्लबचे सदस्य नाहीत त्यांनी सुद्धा या कार्यक्रमात सहभाग नोंदवत या संधीचा संगमनेर मधील सर्व उद्योजकांनी लाभ घेण्याचे आवाहन अध्यक्ष सागर हासे यांनी केले आहे.
