महाराष्ट्र संवाद न्यूज नेटवर्क
प्रबोधनकार म्हणजेच केशव सिताराम ठाकरे यांचा आज स्मृतिदिन. प्रबोधनकारांच्या स्मृतिदिनानिमित्त त्यांचे नातू म्हणजेच महाराष्ट्र नवनिर्माण सेनेचे अध्यक्ष राज ठाकरे यांनी एका पोस्टच्या माध्यमातून त्यांना अभिवादन केले आहे. याशिवाय आज ‘प्रबोधनकार डॉट कॉम’या संकेतस्थळाचे लोकार्पण माजी मुख्यमंत्री आणि शिवसेना प्रमुख उद्धव ठाकरे व वंचित बहुजन आघाडीचे अध्यक्ष प्रकाश आंबेडकर यांच्या हस्ते होत आहे.
प्रबोधनकारांच्या संकेतस्थळाचे निमित्ताने हे दोन्ही नेते आज एकाच व्यासपीठावर येत आहेत. सायंकाळी साडेसात वाजता दादरच्या शिवाजी मंदिरात संकेतस्थळाचा लोकार्पण कार्यक्रम होत आहे. जास्तीत जास्त लोकांपर्यंत प्रबोधनकार पोहोचवावे या उद्देशाने ‘प्रबोधनकार डॉट कॉम’ या संकेतस्थळाची निर्मिती करण्यात आली आहे.
दरम्यान, १७ सप्टेंबर २०१० रोजी प्रबोधनकारांच्या १२५ व्या जन्मदिनी शिवसेना पक्षप्रमुख उद्धव ठाकरे आणि ‘पद्मश्री’ नामदेव ढसाळ यांच्या हस्ते या संकेतस्थळाचे उद्घाटन झाले होते. आता बदलत्या तंत्रज्ञानानुसार प्रबोधन प्रकाशनचे हे संकेतस्थळ नव्या स्वरूपात आणले जात असून त्याचे लोकार्पण केले जाणार आहे.
प्रबोधनकार ठाकरे संयुक्त महाराष्ट्र लढ्यातील बिनीचे शिलेदार, समाजसुधारक, पत्रकार, फर्डे वक्ते म्हणून ओळखले जाते. एकीकडे प्रबोधनकार डॉट कॉम संकेतस्थळाचे लोकार्पण होत असताना दुसरीकडे महाराष्ट्र नवनिर्माण सेनेचे अध्यक्ष राज ठाकरे यांनी समाज माध्यमावरील आपल्या या पोस्टमध्ये ‘त्यांनी दिलेला ‘ठाकरी’ बाणा, जो माझ्यासह पुढच्या पिढीत आलाय’, असं लिहिले आहे.
राज ठाकरे नेमके काय म्हणाले या पोस्टमध्ये...
“आज आमच्या आजोबांची – प्रबोधनकारांची पुण्यतिथी. अन्याय दिसला तर लाथ मारायची, जे खरं असेल ते ठासून मांडायचं, आणि हे करताना नफा, नुकसान असल्या क्षुल्लक गोष्टींचा विचार करायचा नाही, हा आजोबांनी दिलेला ‘ठाकरी’ बाणा, जो पुढच्या पिढीत आला आणि माझ्यातपण आला. मी आजोबांनी रुजवलेला हा ठाकरी बाणा कायम कटाक्षाने अंमलात आणायचा प्रयत्न करत आलोय आणि पुढे पण करत राहीन. आणि हेच बाळकडू पुढे पण देईन हे नक्की”, आजोबांच्या स्मृतीस अभिवादन. असे राज ठाकरे यांनी आपल्या पोस्टमध्ये लिहिले आहे.
#प्रबोधनकारठाकरे pic.twitter.com/OpNMgwPSxm
— Raj Thackeray (@RajThackeray) November 20, 2022
