महाराष्ट्र संवाद न्यूज नेटवर्क
संगमनेर रोटरी क्लब आणि मुंबईच्या रत्ननिधी चॅरिटेबल ट्रस्टच्या वतीने अपंग व्यक्तींसाठी यांत्रिक हात, जयपुर फुट, कॅलिपर्स, क्रचेस आदींचे मोफत वितरण करण्यात आले.
यावेळी प्रमुख पाहुणे म्हणून उद्योजक संतोष करवा, उद्योजक आर. एम. कातोरे, रोटरी डिस्ट्रीक्ट ३१३२ चे सहाय्यक प्रांतपाल गौरव भुजबळ आदी मान्यवर उपस्थित होते. शिबिरात एकूण २४२ दिव्यांग व्यक्तींना हाथ, पाय, कुबड्या, कॅलीपरचे उपस्थितांच्या हस्ते वाटप करण्यात आले.
यावेळी बोलताना संतोष करवा म्हणाले, संगमनेर रोटरी क्लब करीत असलेले काम कौतुकास्पद आहे ज्यामुळे दिव्यांग बंधू भगिनींच्या चेहऱ्यावर आनंद निर्माण करता आला.
कातोरे म्हणाले, सामाजिक उपक्रम राबविणार्‍या रोटरी क्लबचे कार्य देवत्वाची प्रचिती देणारे आहे. यावेळी त्यांनी रोटरीसाठी आर्थिक मदतही जाहीर केली.
गौरव भुजबळ म्हणाले, समाजातील रंजल्या गांजल्या घटकाला रोटरी क्लब सामाजिक, शैक्षणिक आणि आरोग्य विषयक मदत करत असतो. समाजातील शेवटच्या घटकापर्यंत पोहोचून त्यांचे काम सुरू आहे. भुजबळ यांनी देखील जानेवारी २०२३ मध्ये होत असलेल्या तिरळेपणा निर्मूलन शिबीरासाठी आर्थिक मदत जाहिर केली. याप्रसंगी रोटरी सदस्य अरविंद कासट, दिलीप कोकणे, प्रमोद मणियार यांनीही वाढदिवसाच्या निमित्ताने आर्थिक मदत देऊन वाढदिवस साजरा केली. 
रोटरीचे अध्यक्ष ऋषिकेश मोंढे म्हणाले, सर्व रोटरी सदस्य आपले व्यावसायिक व्याप सांभाळून रोटरीसाठी वेळ देत आहेत त्यामुळेच मोठे प्रकल्प यशस्वी होत आहेत. याप्रसंगी सूत्रसंचलन अजित काकडे यांनी केले तर आभार सचिव आनंद हासे यांनी मानले. शिबिर यशस्वी करण्यासाठी प्रकल्पप्रमुख महेश वाकचौरे, संजय कर्पे, डॉ. सुजय कानवडे, डॉ. प्रमोद राजुस्कर यांनी परिश्रम घेतले.
