महाराष्ट्र संवाद न्यूज
न्यायालयात सुरू असलेल्या खून आणि मोका केस मधून तक्रारदाराच्या मावस भावाला सुटकेसाठी मदत करण्याकरिता सत्र न्यायालयाच्या वरिष्ठ लिपिकाने तब्बल दहा लाख रुपयांची लाच मागितली असल्याचा प्रकार समोर आला आहे. लाच लुचपत प्रतिबंधक विभागाने लावलेल्या सापळ्यात हा लाचखोर लिपिक दीड लाख रुपये स्वीकारताना रंगेहाथ पकडला गेला.
सचिन अशोक देठे वय ३९ वर्ष असे या लाचखोर वरिष्ठ लिपिकाचे नाव आहे. लाच लुचपत विभागाने गुरुवारी ही कारवाई केली. तक्रारदाराच्या मावस भावाविरोधात खून व मोका केसचा खटला पुण्याच्या शिवाजीनगर सत्र न्यायालयात सुरू आहे. या खटल्याच्या साक्षीचे जाबजबाब टायपिंग करताना आवश्यक ते बदल करून केस मधून सुटकेसाठी मदत करतो असे सांगत सत्र न्यायालयाचा वरिष्ठ लिपिक सचिन अशोक देठे याने तक्रारदाराकडे दहा लाख रुपयांची मागणी केली होती.
तक्रारदाराने यासंदर्भात लाच लुचपत प्रतिबंधक विभागाच्या पुणे युनिटशी संपर्क साधत तक्रार दिली होती. लाच लुचपत विभागाच्या पडताळणी वेळी आरोपीने दोन लाख रुपयांची मागणी केली होती. आरोपी देठे याने लाचेची मागणी केल्याचे स्पष्ट होतात लाच लुचपत प्रतिबंधक विभागाच्या अधिकाऱ्यांनी पोलीस अधीक्षक अमोल तांबे अप्पर पोलीस अधीक्षक सुरज गुरव यांच्या मार्गदर्शनाखाली सापळा लावला होता.
तक्रारदाराकडून दीड लाख रुपयांची लाच स्वीकारताना न्यायालयाबाहेरील रस्त्यावर एका झेरॉक्स दुकानासमोर आरोपीला अधिकाऱ्यांनी ताब्यात घेतले. वरिष्ठ लिपिक असलेल्या देठे याच्या विरोधात पुण्याच्या शिवाजीनगर पोलीस ठाण्यामध्ये गुन्हा दाखल करण्यात आला असून त्याला अटक करण्यात आली आहे. लाच लुचपत प्रतिबंधक विभागाच्या पुणे युनिटच्या पोलीस निरीक्षक ज्योती पाटील यासंदर्भात तपास करत आहेत. अशी माहिती सहाय्यक पोलीस आयुक्त श्रीहरी पाटील यांनी दिली.
