महाराष्ट्र संवाद न्यूज
पहाटेच्या सुमारास घरात घुसलेल्या बिबट्याने केलेल्या हल्ल्यामध्ये ८० वर्षीय वयोवृद्ध गंभीर जखमी झाला. उपचारासाठी या वयोवृद्ध व्यक्तीला नाशिकला हलविण्यात आले आहे. अकोले तालुक्यातील निंब्रळ येथील तिटमे वस्ती शिवारात ही घटना घडली.
निवृत्ती सयाजी उघडे असे या वृद्धाचे नाव असून त्यांच्यावर नाशिकमध्ये उपचार सुरू आहेत. त्यांच्या उजव्या कांद्याजवळ दंडाला बिबट्याने चावा घेतला. गुरुवारी रात्री निवृत्ती उघडे हे नेहमीप्रमाणे आपल्या घरातील उंबरठ्यावर झोपलेले होते. त्यांच्या घराला दरवाजा नाही. घरालगत बकऱ्या आणि शेळ्या बांधण्यात आलेल्या होत्या. त्या बंदिस्त होत्या. त्यांच्या घरालगत ऊसाचे शेत आहे.
शुक्रवारी पहाटे दोन वाजण्याच्या सुमारास या शेतातून आलेला बिबट्या थेट उघडे यांच्या घरात घुसला. उंबरठ्यात झोपलेल्या उघडे यांच्यावर बिबट्याने हल्ला केला. उघडे यांच्या ओरडण्याने घरातील इतर लोक जागे झाले. त्यांनी आरडाओरड केल्याने बिबट्या ऊसाच्या शेतात पसार झाला.
शुक्रवारी सकाळी घटनास्थळी आलेल्या राजुर वनविभागाच्या वनपरिक्षेत्र अधिकारी राजश्री साळवे यांनी घटनास्थळी भेट देत पाहणी केली. वनकर्मचारी, गावकरी आणि उघडे कुटुंबीयांच्या मदतीने जखमी अवस्थेतील उघडे यांना अकोले येथील ग्रामीण रुग्णाल यात उपचारासाठी नेण्यात आले. मात्र त्यांचे प्रकृती आणि वयोमान लक्षात घेता त्यांना पुढील उपचारासाठी नाशिक येथे हलविण्यात आले आहे.
